ვინ გასცა ბრძანება? ისროდნენ თუ არა დამიზნებით? – ეს ყველაფერი არის მეორეხარისხოვანი, აი ასე, ჩემთვის პირადად არის მეორეხარისხოვანი – გიორგი გახარია 20 ივნისის მოვლენებზე

20 ივნისთან დაკავშირებით არსებული კითხვების – თუ ვინ გასცა სროლის ბრძანება, ისროდნენ თუ არა დამიზნებით და ა.შ., პასუხად საქართველოს პრემიერ-მინისტრი გიორგი გახარია აცხადებს, რომ არ ისროდნენ დამიზნებით და რომ, პირადად მისთვის, ყოველივე ეს არის მეორეხარისხოვანი. მთავრობის მეთაურისათვის მთავარი და მნიშვნელოვანი იყო შინაგან საქმეთა სამინისტროს ეფექტური მუშაობა, რის შედეგადაც ქვეყანას თავიდან აარიდეს დესტაბილიზაცია და არეულობა:

“20 ივნისთან დაკავშირებით უამრავი სხვადასხვა კითხვა იქნება: ვინ გასცა ბრძანება? ისროდნენ თუ არა დამიზნებით? არ ისროდნენ… – ეს ყველაფერი არის მეორეხარისხოვანი. აი ასე, ჩემთვის პირადად, არის მეორეხარისხოვანი.

რა არის ჩემთვის მთავარი? – ჩემთვის მთავარი არის ის, რომ 20 ივნისს 1 წელი გავა, 2 წელი გავა თუ ბევრი წელი გავა ამის შემდგომ, ეს იყო ქმედება, რომლითაც შინაგან საქმეთა სამინისტრომ და საქართველოს სამართალდამცავმა სისტემამ ქვეყანას აარიდა დიდი დესტაბილიზაცია და არეულობა.

ეს იყო პარლამენტზე შტურმი, სახელმწიფო ინსტიტუტზე შტურმი, რომელიც შინაგან საქმეთა სამინისტრომ, მისმა თითოეულმა თანამშრომელმა, მთლიანად სამართალდამცავმა სისტემამ არ დაუშვა, ეს იყო მათი მოვალეობა, რაც მათ უნდა გაეკეთებინათ და მათ ეს გააკეთეს, ” – განაცხადა გიორგი გახარიამ.

ავტორი
თამთა ასლანიშვილი