ქუთაისის საკრებულოს ფრაქცია “ერთიანი ნაციონალური მოძრაობის” თავმჯდომარე გიგა შუშანია მერიას უმოქმედობაში ადანაშაულებს და აცხადებს, რომ 2012 წლის შემდეგ ქუთაისში “ქართულ ოცნებას” არც ერთი დაპირებული ტურისტული ლოკაცია არ შეუქმნია. ფაქტის სადემონსტრაციოდ შუშანიამ რიონისპირა სახლების შეჩერებული პროექტი განიხილა:
“ქუთაისის მოსახლეობას ახსოვს, როგორ დადიოდნენ ჩინოვნიკები ეთერიდან ეთერში ფოტოშოპით შექმნილი ფოტოებით და ეუბნებოდნენ მათ, რომ რიონისპირა სახლები გარემონტდებოდა. აღმოჩნდა, რომ ადამიანს, რომელმაც მოიგო პროექტირების შესახებ ტენდერი, ეს ტენდერი გაუუქმეს.
2012 წლის შემდეგ “ქართულ ოცნებას” ქუთაისისთვის არც ერთი ტურისტული ლოკაცია არ შეუმატებია, გაუბედურებულ თეთრ ხიდს თუ არ ჩავთვლით. სამწუხაროდ, “ქართული ოცნება” თვლის, რომ ქუთაისელებისათვის ინფრასტრუქტურული პროექტების გაკეთება მხოლოდ ბანერებზეა საკმარისი.
ქუთაისი დღეს არის მოუვლელი, გადათხრილი და არ არსებობს არც ერთი ახალი ლოკაცია, რომ ტურისტებმა რაიმე სიახლე ნახონ. ეს პროექტები მხოლოდ წინასაარჩევნოდ ბანერებზე ნაჩვენები დაპირება იყო. არჩევნების შემდეგ კი მათი ბედი აღარ აინტერესებთ,”-განაცხადა გიგა შუშანიამ.
ოპოზიციის კრიტიკას ადგილობრივ თვითმმართველობაში პასუხობენ. მერის მოადგილის განმარტებით, მალე ახალი ტენდერი გამოცხადდება და რიონისპირა სახლების რეაბილიტაციის პროექტი აუცილებლად განხორციელდება:
“ოპოზიციის განცხადება წარმოადგენს სამწუხარო სპეკულაციას, რადგან ტენდერი არ გაუქმებულა. მუნიციპალური განვითარების ფონდმა უკვე გააკეთა ოფიციალური განცხადება რომ ახალი ტენდერი უახლოეს დღეებში გამოცხადდება. ეს არის სახელშეკრულებო ურთიერთობა, რომელიც არსებობს მუნიციპალური განვითარების ფონდსა და კონკრეტულ შემსრულებელს შორის და ის კონკრეტული პრეტენზიების გამო შეწყდა.
80-იანი წლების შემდეგ ეს იყო პირველი შემთხვევა, როდესაც დღის წესრიგში რიონისპირა სახლების რეაბილიტაციის საკითხი დადგა და მხოლოდ ამ ხელისუფლების პირობებში დაიძრა საკითხი, რომელიც უახლოეს მომავალში აუცილებლად განხორციელდება,” – ამბობს ნინო თვალთვაძე.
შეგახსენებთ, ქუთაისში რიონისპირა სახლების რეაბილიტაცია 2018 წელს დაანონსდა. მუნიციპალური განვითარების ფონდის მიერ გამოცხადებულ ტენდერში კომპანია “კარკასმა” გაიმარჯვა, თუმცა, ფონდმა მას პროექტი შეუწყვიტა და ვადების გადაცილების მიზეზით ხელშეკრულება შეუწყვიტა, რასაც კონპანიის წარმომადგენლობა აპროტესტებს.
ლიკა დევდარიანი
სააგენტო “პარალელის”
რეგიონალური კორესპონდენტი