„ძალიან მტკივნეულია ამის აღიარება, მაგრამ გვიწევს. ანტისახელმწიფოებრივი ხელისუფლების პირობებში ჩვენი ქვეყანა რუსეთის სპეცსამსახურებისა და პუტინის ტერორისტების თარეშის ველად გადაიქცა,“ – ეს განცხადება ერთიანი ნაციონალური მოძრაობის ლიდერმა გრიგოლ ვაშაძემ პარტიის ქუთაისის ოფისში გამართულ ბრიფინგზე გააკეთა. ის გიორგი გაბუნიას ლიკვიდაციის მცდელობის ფაქტს გამოეხმურა და ჟურნალისტს სოლიდარობა გამოუცხადა.
„გუშინ საღამოს ტელეკომპანი „მთავარი“-ს გენერალურმა დირექტორმა ნიკა გვარამიამ გაასაჯაროვა ინფორმაცია, რომ რამზან კადიროვის დაკვეთით რუსეთის ფედერაციის მოქალაქე, ვინმე ვასამბეგ ბოკოვი, გეგმავდა ტელეკომპანიის ერთ-ერთი წამყვანი ჟურნალისტის გიორგი გაბუნიას ლიკვიდაციას.
შესაბამისი უწყებები კი სახელმწიფოს უშიშროებაზე ზრუნვის ნაცვლად, ოპოზიციის დევნით და მიყურადებით არიან დაკავებული და უსაფრთხოების სისტემა სრულიად მოშლილია.
კარგად გვახსოვს, როგორ გამოუშვეს ციხიდან ახმედ ჩატაევი, როგორ შემოუშვეს საქართველოში, როგორ აცხოვრეს თბილისის ცენტრში, როგორ დააწყებინეს საომარი მოქმედებები, რასაც ჩვენი ჯარისკაცის სიცოცხლე ემსხვერპლა. შესანიშნავად გვახსოვს, რამდენიმე დღის წინ როგორ დააკავეს ბათუმის ცენტრში თურქული დაჯგუფება, რომელსაც იზმირის მერის ლიკვიდაცია ედებოდა ბრალად. “ოცნებისტების” მთავრობის საქმიანობის შედეგად ჩვენ სახელმწიფო აღარ გვაქვს.
დღეს, სოლიდარობას ვუცხადებთ „მთავარს“, ბატონ გაბუნიას და ყველა თავისუფლებისმოყვარე ჟუნალისტს, რომელიც ამ არხზე მუშაობს. მოვითხოვთ, მაქსიმალურად სწრაფად და დეტალურად გამოიძიონ ეს დანაშაული. საკითხთან დაკავშირებული ყველა ინფორმაცია კი გასაჯაროვდეს, რადგან გამოძიებისადმი ნდობა არის ძალიან დაბალი და საჯაროობა აუცილებელია,“ – განაცხადა გრიგოლ ვაშაძემ.
შეგახსენებთ, გუშინ გავრცელდა ინფორმაცია, რომ რუსეთის სპეცსამსახურების მიერ ქართველი ჟურნალისტის გიორგი გაბუნიას ლიკვიდაცია იგეგმებოდა. სუსის ინფორმაციით, განზრახ მკვლელობის მომზადების ფაქტზე რუსეთის ფედერაციის მოქალაქე დააკავეს.
ლიკა დევდარიანი
სააგენტო “პარალელის”
რეგიონალური კორესპონდენტი
