საერთო ოპოზიციური სიის ფორმირებისა და არჩევნებზე ერთიანი ფრონტით გასვლის თაობაზე საქართველოს მე-3 პრეზიდენტ მიხეილ სააკაშვილის ოპოზიციისადმი შეთავაზებას ეხმიანება “ლეიბორისტული პარტიის” თავმჯდომარე. შალვა ნათელაშვილს მიაჩნია, რომ მიუხედავად კეთილშობილური განზრახვისა სააკაშვილის წინადადება ბიძინა ივანიშვილის ინტერესშია.
“მინდა გამოვეხმაურო ექსპრეზიდენტ სააკაშვილის განცხადებას საერთო ოპოზიციური სიის შედგენასთან დაკავშირებით. ვფიქრობ, რომ ამ სურვილს კეთილშობილური მოსაზრებები უდევს საფუძვლად, მაგრამ აუცილებელია განვაცხადოთ შემდეგი:
პირველად საქართველოს ისტორიაში, პოლიტიკურმა სპექტრმა, მოახერხა გაერთიანება იდეის, მიზნის და არა სიის გარშემო. შედეგები გრანდიოზულია. გადავანგრიეთ მაჟორიტარული მძარცველური სისტემა პოლიტიკურ იერარქიაში, განთავისუფლებულია პოლიტპატიმართა უდიდესი უმრავლესობა. მზადდება ხელისუფლების სრული დეორგანიზაცია და რეზორგანიზაცია და იმავდროულად ვემზადებით მრავალპარტიული მთავრობის შესაქმნელად, რაც გამორიცხავს ერთპარტიულ მმართველობას და კერპების წარმოშობას.
საერთო სია, შექმნილ ვითარებაში, ეს იქნება ჩასაძირად გამზადებული ტიტანიკი, რაც ოლიგარქის უძველესი ოცნებაა, რათა მან დაყოს კვლავ პოლიტიკური სივრცე ორ პოლუსად – თეთრად და შავად, კეთილად და ბოროტად, წარსულად და მომავლად.
ჩვენ ყველაფერი უნდა გავაკეთოთ, რომ ეს მიზანი ოლიგარქმა ვერ შეასრულოს, არ შეასრულოს და რამდენიმე თვეში, თავის დანაშაულებრივ ჯგუფთან ერთად, დაგვემშვიდობოს,” – განაცხადა შალვა ნათელაშვილმა.
