ჟურნალისტი, მერაბ მეტრეველი კახეთში, სასტუმრო “Agarani Estate”-ში, მომხდარ ინციდენტთან დაკავშირებით საზოგადოების არაერთგვაროვან რეაქციას კონკრეტული მინიშნებებით და მძიმე შეფასებებით ეხმაურება:
“ძალიან საინტერესოა, როგორ მივედით იქამდე, რომ საკმაოდ აზრიანი ხალხი კამათის დროს ასეთ არგუმენტს იყენებს: – რუსი ქალი ქალი არ არის… ქალის ცემა არ შეიძლება, მაგრამ რუსი ყველაფრის ღირსია და ა. შ.
რუსები რომ გულზე არ მეხატება და არაფერს რუსულს არ ვეკარები, კარგად იცით, მაგრამ მაგ მსჯელობიდან ფაშიზმამდე ერთი ნაბიჯია, მეგობრებო.
სწორედ მაგ არგუმენტებით მომხდარა ყველა ეთნიკური წმენდა და მასობრივი მკვლელობები, რომ მტერში ადამიანი არ უნდა დაინახო და გძულდეს არა მხოლოდ ის, ვინც ტყვიას გესვრის, არამედ ყველა მის მოდგმაში.
ამ ლოგიკით მართლდება კონფლიქტების დროს ქალების და ბავშვების ხოცვა.
მაგალითად, მაგ არგუმენტით ხელმძღვანელობდნენ აფხაზები, როდესაც ქართულ მშვიდობიან მოსახლეობას ხოცავდნენ, რომ ქართველი ადამიანი კი არა, მტერი იყო და შეგეძლო მისი ქალისთვის და ბავშვისთვის ყველაფერი გექნა.
ნუ დაემსგავსებით ამ ხალხს. სიძულვილი ადამიანურ საწყისებს ნუ დაგაკარგვინებთ.
ბოლოს და ბოლოს ნუ დაემსგავსებით კალაძეს, რომელმაც, როდესაც აქციებში მონაწილე ქალების ცემაზე ჰკითხეს, თქვა: ეგენი ქალები არ არიანო“, – წერს მერაბ მეტრეველი სოციალურ ქსელში.
ინფორმაციისთვის: თელავში, სასტუმრო “Agarani Estate”-ში გამართული ქორწილის დროს კონფლიქტი მოხდა. გავრცელებული ინფორმაციით, სასტუმროს ერთ-ერთი ნომრის აივნიდან, სავარაუდოდ რუსმა ტურისტმა ქალებმა შეურაცხყოფა მიაყენეს ქორწილში მყოფ სტუმრებს და მათ სხვადასხვაგვარი სითხე გადაასხეს, რის შემდეგაც მათთან ნომერში, საკითხის გასარკვევად, ქორწილის მონაწილე ავიდა, თუმცა მძიმე საუბარი ფიზიკური დაპირისპირებაში გადაიზარდა, რა დროსაც მამაკაცმა ხელი გაარტყა ქალს.
