“საარსებო კრიზისთან დაკავშირებით საქართველოს მოქალაქეებისთვის საზოგადოებრივი ტრანსპორტი უნდა გახდეს უფასო!” – ანა დოლიძე

პარტია “ხალხისთვის” თავმჯდომარე, ანა დოლიძე საარსებო კრიზისთან დაკავშირებით კონკრეტულ ინიციატივას სთავაზობს მმართველ გუნდს:

“ადრეც ვთქვი და ახლაც გავიმეორებ, შექმნილ საარსებო კრიზისთან დაკავშირებით საქართველოს მოქალაქეებისთვის საზოგადოებრივი ტრანსპორტი უნდა გახდეს უფასო! ეს არის მიღებული, შედარებით სწრაფი ფორმა:

1. მყისიერად შევეხიდოთ ხალხს და კრიზისის დროს ასეულობით ლარი დავუზოგოთ;

2. მხოლოდ საქართველოს მოქალაქეებისთვის, რაც ასეთ დროს მიღებული ფორმაა. დიდი ხანია ვიბრძვი რომ ისედაც, მუზეუმებსა და პარკებში იყოს ორნაირი ფასი: საქართველოს მოქალაქეებისთვის და უცხოელებისთვის. ეს პრაქტიკა დანერგილია ბევრ ევროპულ ქვეყანაში;

3. ეს ნაბიჯი გაკეთდება სწრაფად, არ მოითხოვს დიდ აზროვნებას, რისი უნარიც, ბუნებრივია, მმართველ პარტიას არ აქვს;

4. საარსებო კრიზისთან მიმართებით ეს ნაბიჯი გადაიდგა მსოფლიოს ბევრ ქალაქში.

ნათია თურნავას რომ ჰკითხოთ, გაძვირებული ფასების შემხედვარე გაძვირებული სესხების სახით უნდა ამოიღოს ჩვენი ჯიბიდან ფული და ჩაიდოს კიდევ მეტი შემოსავალი ბანკებს. სესხების გაძვირება, უკვე არსებულ საარსებო კრიზისს კიდევ უფრო ამძაფრებს. ჩვენი უსამართლო ეკონომიკა ამ ნაბიჯით კიდევ უფრო უსამართლო გახდა“, – წერს ანა დოლიძე სოციალურ ქსელში.