საქართველოს დამოუკიდებლობის დღისადმი ემოციური მისალოცი ტექსტები იმერეთის ოპოზიციური პარტიების ლიდერების ნაწილმა ფეისბუკის საკუთარ გვერდზე გამოაქვეყნა, რამდენიმეს კი სააგენტო “პარალალელი” უშუალოდ დაუკავშირდა და მათი განცხადებები მოისმინა. რაზე ამახვილებდნე ყურადღებას ოპოზიციონერი ლიდერები და რას ნიშნავს მათთვის 26 მაისი, ამ კითვებზე პასუხებს მათ განცხადებებში ნახავთ:
“რთულია სხვაგან მოძებნო ისეთი ქვეყანა, რომლის გამოწვევებსა და მისივე საზოგადოების ერთი ნაწილის ფასეულობებს შორის ასეთი დიამეტრალური განსხვავებაა, მეეჭვება სადმე არსებობდეს ქვეყანა, რომელსაც ამდენი მოღალატე და გმირი, რეგვენი და ბრძენი ჰყოლია ერთდროულად, თითქმის შეუძლებელია მოგაფიქრედეს სხვა ქვეყანა, სადაც სიახლეს და პროგრესს ასე ეჭვით უმზერდეს ერის ერთი ნაწილი, როცა მეორეს ასე დაუოკებელი სურვილი აქვს იგივე ცვლილებების.
უზომოდ მიყვარს ჩემი წინააღმდეგობებით აღსავსე სამშობლო, რადგან ერდროულად ჩემი ბაბუის ბაბუას ძვალთშესალაგი და ჩემი შვილიშვილების ხვალინდელი დღის ქვეყანაა იგი. ამიტომ ვერავის დავუთმობ, ვიდრე პირში სული მიდგას!!!
გილოცავთ დამოუკიდებლობის დღეს! გახსოვდეთ საქართველო ევროპის ნაწილია და იბერია აუცილებლად გაბრწყინდება!” – წერს გაერთიანებული ოპოზიცია “ძალა ერთობაშია” ქუთაისის ოფისის ერთ-ერთი ლიდერი გია თევდორაძე.
„პარტია „ლელო“ ულოცავს სრულიად საქართველოს დამოუკიდებლობის დღეს. ქართულმა საზოგადოებამ მსოფლიოს ერთ-ერთი ყველაზე პროგრესული და ჰუმანური კონსტიტუცია შექმნა.
დამოუკიდებლობა არის ქვეყნის სუვერენიტეტის და წინსვლის საფუძველი, რომელსაც თვალისჩინივით სჭირდება გაფრთხილება და მოვლა-პატრონობა.
ვუსურვებთ სრულიად საქართველოს მოსახლეობას, აღედგინოს ტერიტორიული მთლიანობა და არა მარტო შეენარჩუნებინოს დამოუკიდებლობა, არამედ ღირსეული ადგილი დაეჭიროს მშვიდობიანი მსოფლიოს რუქაზე,“ – აღნიშნავს, “ლელო საქართველოსთვის” იმერეთის ოფისის ხელმძღვანელი მამუკა მამალაძე.
„მინდა ჩვენს თანამოქალაქეებს მივულოცო დამოუკიდებლობის აღდგენის დღე. ეს არის ძალიან მნიშვნელოვანი თარიღი, რომლისთვისაც ბევრი თაობა იბრძოდა. სამწუხაროდ, ეს ბრძოლა ჯერ კიდევ არ დასრულებულა, რადგან ჩვენი ახალგაზრდა სახელმწიფო ისევ ბევრი გამოწვევის წინაშე დგას.
ვისურვებდი, ეს ბრძოლა რაც შეიძლება მალე მივიყვანოთ ლოგიკურ დასასრულამდე, რაც ევროპულ ოჯახთან სრული ინტეგრაციით და დეოკუპაციით მიიღწევა.
მინდა აქვე აღვნიშნო, რომ დღეს, საქართველოს დამოუკიდებლობისათვის ბრძოლაში თავდადებული და გაუტეხელი კაცის, მერაბ კოსტავას დაბადების დღეა, რაც საქართველოს სიმტკიცის კიდევ ერთი სიმბოლოა.
დიდება გმირებს!“ – განაცხადა ქუთაისის საკრებულოს ფრაქცია „ერთიანი ნაციონალური მოძრაობის“ თავჯდომარემ, გიგა შუშანიამ.
ავტორი
ლიკა დევდარიანი
სააგენტო “პარალელის”
რეგიონალური კორესპონდენტი