გაჟღერებულ მოთხოვნებს, იმპორტირებული პროდუქტების დაბეგვრასთან დაკავშირებით, რათა ადგილობრივი პროდუქტი უფრო ძვირად გაიყიდოს, კონკრეტული შეფასება-განმატებებით და თავისი პოზიციის დაფიქსირებით ეხმაურება “ოპოზიციის ალიანსის” და “კოალიცია ცვლილებებისთვის” ერთ-ერთი ლიდერი, ნიკა გვარამია:
“უნდა ჩამოვყალიბდეთ, ბოსტნეულის გაიაფება გვინდა და გაჭირვებულისთვის ცხოვრების შემსუბუქება, თუ შემოტანილი პროდუქციის (რაც, სამწუხაროდ, მოხმარების 2/3-ზე მეტია, ძირითადად) კიდევ უფრო გაძვირება და ამ გზით ადგილობრივი პროდუქტისთვის კონკურენციის გამარტივება.
ორივე ერთად არ გამოდის, მიტ უმეტეს, მოკლე და საშუალოვადიან პერსპექტივაში.
კიდევ უფრო გაუგებარია, პირველადი მოხმარების პროდუქტებზე გადასახადების დაწევას ემხრობოდე და თან შემოტანილი პომიდვრისთვის დაბეგვრის მატებას და მის ხელოვნურ გაძვირებას, ერთდროულად.
მე ადამიანებისთვის ცხოვრების შემსუბუქება მიმაჩნია პირველად ამოცანად, ფასების დაწევა და საგადასახადო ტვირთის მნიშვნელოვნად შემცირება სურსათზე. ყველაფერი სხვა მას მერე იწყება, როცა ბავშვს ნაჭამს გაუშვებ სკოლაში და მისი უკან დაბრუნების არ შეგეშინდება, იმიტომ რომ მაცივარი ცარიელი გაქვს.
სოფლის მეურნეობა ნამდვილად უმნიშვნელოვანესია და კი, სატარიფო პროტექციონიზმის და კონკურენტული უპირატესობის ხელოვნურად მინიჭების გარდა, ბევრად ეფექტიანი და ეკონომიკურად ჯანსაღი გზები არსებობს. ბევრად, და თანნ ფუნდამენტურად მდგრადი და დარგის განვითარების ხელშემწყობი, და არა გაჭირვებულებისთვის თურქული პომიდვრის კიდევ უფრო გაძვირების და დამშევის ხარჯზე საეჭვო და მყისიერ პოლიტიკურ ეფექტზე გათვლილი“, – წერს ნიკა გვარამია სოციალურ ქსელში.
