ტვ “იმედზე” გამართულ დებატებს განათლების რეფორმასთან დაკავშირებით კონკრეტული შეფასება-განმარტებებით ეხმაურება განათლების ყოფილი მინისტრი, ილიას სახელმწიფო უნივერსიტეტის პროფესორი, პოლიტოლოგი გია ნოდია:
“ზედაპირული შთაბეჭდილება „იმედის“ დებატებზე განათლების რეფორმის შესახებ.
ირაკლი კობახიძის ამოსავალი თეზისია, რომ უმაღლეს განათლებაში „მძიმე მდგომარეობაა“, ესე იგი, რადიკალური რეფორმაა საჭირო.
ეს „მძიმე მდგომარეობა“ საბუთდება საერთაშორისო რეიტინგებით (როცა გაწყობს, „დიფ სტეიტის“ რეიტინგები სანდოა; როცა არა, მაგალითად, როცა დემოკრატიას გიწუნებენ, აღარაა სანდო. მაგრამ ეს ცალკე იყოს).
თუ დიაგნოზს რეიტინგებზე აგებ, მკურნალობის განსაზღვრაში რატომ აღარ იყენებ? განათლების ხარისხზე ვზრუნავო, ამბობ, თან სხვადასხვა უნივერსიტეტებში ხარისხის უთანაბრობას აცხადებ პრობლემად. მაშინ რა ლოგიკით ჩეხავ უნივერსიტეტს, რომლის პროგრამები ამავე რეიტინგებით სხვაზე მაღლა დგას?
როცა წყვეტ, რომელი პროგრამა დახურო და რომელი დატოვო, არც კი თვლი, რომ ხარისხი ფაქტორია – ამის მაგივრად შემოგაქვს „ტრადიციული პროფილის“ გაუგებარი კრიტერიუმი, რომელსაც ხარისხთან არავითარი კავშირი არა აქვს.
არსებული ნაკლოვანებების ჩამოთვლას დიდი ჭკუა არ სჭირდება; არგუმენტი და დასაბუთება იმას უნდა, შენი რეფორმა მდგომარეობას როგორ გამოასწორებს (თუნდაც ის რეიტინგი რის ხარჯზე ამაღლდება). ამის არგუმენტი მთავრობას საერთოდ არ აქვს და არც ეტყობა, რომ ამაზე უფიქრია.
კობახიძის მიერ ოპონენტებისგან „არგუმენტების“ აკვიატებული მოთხოვნა მარტივი დემაგოგიაა, რომელიც მის საკუთარ უარგუმენტობას ნიღბავს.
ცხადია, რაღაც აუდიტორიაზე ეს დემაგოგია ჭრის; დისკუსანტმა უნდა იცოდეს, ის როგორ ამხილოს. ეს უკვე დებატების ტექნიკაა – რაც ძალიან მნიშვნელოვანი, მაგრამ ახლა ამაზე არ ვლაპარაკობ“, – აღნიშნავს გია ნოდია.
