12 თებერვალს 8-თვიანი პატიმრობის შემდეგ გათავისუფლდა და რუსთავის მე-12 პენიტენციური დაწესებულება დატოვა “კოალიცია ცვლილებებისთვის” ლიდერმა, ნიკა გვარამიამ. პატიმრობის შემდეგ მედიასთან გაკეთებულ პირველ კომენტარებში ოპოზიციონერმა ლიდერმა შეფასებები გააკეთა ქვეყანაში შექმნილ რეალობასთან დაკავშირებით:
“მე ვიცი ერთი რამ, ერთად უნდა გვხედავდნენ, ერთად ვმუშაობდეთ და ერთად უნდა მოვიტანოთ შედეგი. ყბადაღებულ სიტყვას – “ერთობას” არ ვიხმარ, არ ვიცი ამის უკან ვინ, როგორ, რას მოიაზრებს, ყველა სხვადასხვა რამეს… ჩემთვის მნიშვნელოვანია, თუ მოქმედების პლატფორმა როგორია.
არ უნდა გვეშინოდეს, არ უნდა ვაგინებდეთ ერთმანეთს… გულწრფელად გეტყვით, რომ არ ვიცი რას ემსახურება პოლიტიკოსების გინება, ყოველდღიურად. ჩვენც ციხეში პოლიტიკოსები ამას ვადევნებთ თვალყურს და პასუხსაც არ ვცემთ იმიტომ, რომ ეს არ მიგვაჩნია ახლა სწორად და მთავარიც არ გვგონია, იმიტომ არა თითქოს პასუხის გაცემა არ შეგვიძლია.
ყველას ვთხოვდი, რომ სხვის კრიტიკას, სჯობს, ილაპარაკოს საკუთარ მოსაზრებებზე, იმაზე – თავად რას აკეთებს, რას ფიქრობს, რა უნდა გაკეთდეს. იქნებ ვეთანმებით და ჩვენც, როგორც რიგითი ჯარისკაცები, ამას ვაკეთებთ.
ჩვენ არ ვართ მხედართმთავრები, ჩვენ ვართ მებრძოლები, ვისაც გვაქვს პრეტენზია, რომ ვიცით, რა უნდა გაკეთდეს!
თუ ეს ჩვენი პრეტენზიები ფუჭია, არავინაა შეზღუდული იმაში, სწორი რეცეპტები დადოს“, – განაცხადა ნიკა გვარამიამ.
