დებატებში ოპოზიციის მონაწილეობის თემას, კონკრეტული შეფასება-განმარტებებით ეხმაურება ქართველი მწერალი, დრამატურგი ლაშა ბუღაძე:
“პრობლემა ის კი არაა, ვინმე წავა თუ არა პროპაგანდისტულ ტელევიზიაში, არამედ ის, რომ ოპოზიცია არაა ერთიანი კოორდინაციაში – როგორ, რა პირობებით და ულტიმატუმებით უტევს ივანიშვილს, რა გზავნილებით, რომელიც ქართველი ხალხის უმთავრეს პრობლემებს უნდა ეხებოდეს.
ერთიანი შემტევი სტრატეგია არ არსებობს და ეს ფრაგმენტულობაა ჩვენი სისუსტის (და არა მარცხის) უმთავრესი და ტრადიციული მახასიათებელი, თორემ ცხადია პოლიტიკოსი ყველგან უნდა მიდიოდეს, სადაც ლაპარაკის და ხალხზე ზემოქმედების უმცირესი შანსიცაა (ნუ ვთხოვთ პოლიტიკოსს ქვის სროლას, მისი საქმე ხალხის მიმხრობა და გულის მოგებაა), “იმედზე” თუ ივანიშვილის სოციოპათ და უაღრესად სუსტ, მბოდავ და მატყუარა “პრემიერს” ვერ მოუგე კამათში, დიდ ბრძოლას რას მოიგებ? უნდა მოუგო!
ყველას ახსოვს, როგორი სუსტები იყვნენ ქოცები საზოგადოებრივ მაუწყებელზე, როცა რამდენიმე ეთერი მოვიპოვეთ (ხალხმა ყურება დაიწყო ამ არხის, რეიტინგი აეწიათ) და ამიტომაც ჩარაზეს.
ცხადია ივანიშვილის სურვილი ნორმალიზების მცდელობაა, მაგრამ რა უნდა ნორმალიზდეს იმ არანორმალურობაში, რაშიც მისი მიზეზით ვართ – ნუ ვაჭარბებთ მათ უნარებს და ჩვენვე ნუ ვაძლევთ ზედმეტ მნიშვნელობას.
როცა ერთიანები და კოორდინირებულები ვართ – მაშინ ვაღწევთ მიზანს! მთავარი ესაა!
პროპაგანდისტულ არხზე მიმსვლალმა ოპოზიციონერმა კი (რეალურმა და არა სატელიტმა) ყველა ის პრობლემა უნდა გაახმიანოს, რომელიც ხალხს და ქვეყანას აქვს ახლა.
და უნდა მოიგოს!” – წერს ლაშა ბუღაძე სოციალურ ქსელში.
