რამდენიმე დღის წინ, თბილისის პოლიციის დეპარტამენტის დიდუბე-ჩუღურეთის სამმართველოს I განყოფილებაში, “მწვანე სკოლის” შენობაში შეპარვისა და კედლებზე წარწერების გაკეთების ფაქტზე, 15 წლის ლუკა სირაძე პოლიციის განყოფილებაში დედის თანდასწრებით გამოიკითხა, რა დროსაც, გავრცელებული ინფორმაციით, არასრულწლოვანს ემუქრებოდნენ, მასზე მოხდა ზეწოლა და ითხოვდნენ დანაშაულის აღიარებას.
ამ ფაქტის შემდეგ, არასრულწლოვანი საცხოვრებელი კორპუსის მეცხრე სართულიდან გადმოხტა, რა დროსაც უკიდურესად მძიმე დაზიანებები მიიღო, რის შედეგადაც 17 დეკემბერს, გონზე მოუსვლელად გარდაიცვალა.
როგორც აღინიშნა, პოლიცია მოზარდს სკოლის შენობაზე კონკრეტული წარწერების გაკეთების ედავებოდა. წარწერებს შორის კი იყო შემდეგი სახის საპროტესტო პოზიცია “ამ ცხოვრების დედაც…”
სააგენტო “პარალელი” ღრმა მწუხარებას გამოთქვამს არასრულწლოვანის გარდაცვალების გამო და უსამძიმრებს მის ოჯახსა და ახლობლებს!