ქართველი საოპერო მომღერალი, მსოფლიო ბანი, პაატა ბურჭულაძე კომენტარს აკეთებს ელექტრონული არჩევნების პროექტთან დაკავშირებით და ასევე აცხადებს, რომ არსებული სისტემით ჩატარებული არჩევნები გაყალბების დიდ საფრთხეს შეიცავს და პარტიებს მოუწოდებს, არ მიიღონ ამ არჩევნებში მონაწილეობა:

,,ჩვენ უნდა ჩავატაროთ ისეთი არჩევნები, მომავალში, რომელიც არის აბსოლუტურად თავისუფალი და შეუძლებელია გაყალბება. იმ არჩევნებში, რომელსაც ატარებს ბიძინა ივანიშვილი, არსებობს გაყალბების დიდი საფრთხე. ამიტომ, ასეთ არჩევნებში ვინც აპირებს მონაწილეობის მიღებას, – თავს იტყუებს.

ჩვენ გვინდა, რომ გავიდეთ ხალხში და მოვუწოდოთ ყველას, რომ ამ არჩევნებში მონაწილეობა არ მიიღონ, უნდა დაიბლოკოს ეს თვითმმართველობის არჩევნები.

ახლა, რაც შეეხება ინტერნეტ არჩევნებს ჩვენ დღეს ჩავატარეთ პრეზენტაცია, რომელიც არის უტყუარი და რომელიც აუცილებლად გამოიღებს თავის შედეგს. ცოტა ხანში, მაქსიმუმ 2 თვეში ჩვენ გვექნება უკვე მთლიანად აღჭურვილობა ამის.

ადგილობრივი თვითმმართველობის არჩევნებში მონაწილეობა არავინ უნდა მიიღოს“, – განაცხადა პაატა ბურჭულაძემ.

ავტორები:
მარიამ ხაჩირაშვილი
პაატა კვირკვაია

“სტრატეგია აღმაშენებლის” ლიდერი, გიორგი ვაშაძე საქართველოში აშშ-ს ელჩთან შეხვედრაზე ბიძინა ივანიშვილის უარს ეხმიანება და მწვავე პოლიტიკურ შეფასებებთან ერთად კონკრეტულ პუნქტობრივ განმარტებებს აკეთებს:

“ამერიკის ელჩთან შეხვედრაზე უარის თქმა – ეს არის უარი ამერიკასთან სტრატეგიულ პარტნიორობაზე და მეგობრობაზე და იმ ყველა სიკეთეზე, რასაც საქართველო დასავლელი პარტნიორებისგან 34 წლის განმავლობაში იღებს.

ეს იყო ძალიან მნიშვნელოვანი გზავნილი ტრამპის ადმინისტრაციის მხრიდან, რომ ივანიშვილს უარი ეთქვა ძალადობაზე, გაყალბებულ არჩევნებზე, ძალაუფლების მიტაცებაზე და ახალი, დემოკრატიული, სამართლიანი არჩევნებით ქვეყანა დაბრუნებულიყო დასავლური ცივილიზაციის ოჯახში.

ივანიშვილმა ამ შანსზე უარი თქვა.

ეს ნიშნავს მხოლოდ ერთს – საქართველო რჩება მარტო, კიდევ უფრო დაუცველი და ეს გამოიწვევს:

• მეტ სანქციებს;

• მეტ იზოლაციას;

• მეტ სიღარიბეს;

• უფრო მეტი ქართველის იძულებას, დატოვოს ქვეყანა.

ეს არ არის პოლიტიკა. ეს არის მიზანმიმართული მტრული ნაბიჯი და ღალატი.

როცა რეჟიმმა სული ეშმაკს მიჰყიდა, ჩვენ გვჭირდება მეტი ერთიანობა და მეტი გამბედაობა”, – აცხადებს გიორგი ვაშაძე.

ინფორმაციას “სტრატეგია აღმაშენებლის” მედიასთან და საზოგადოებასთან ურთიერთობის სამსახური ავრცელებს

„ოპოზიციაში დაპირისპირება ყოველთვის იყო, მათი ლიდერების განცხადებებშიც იკვეთება, რა განწყობები აქვთ ერთმანეთისადმი“, – თვითმმართველობის არჩევნებთან დაკავშირებით ოპოზიციაში არსებულ დაპირისპირებას თბილისის მერი კახა კალაძე მედიასთან გამოეხმაურა.

„ოპოზიციაში დაპირისპირება ყოველთვის იყო. გვახსოვს არაერთი ფაქტი იმისა, რომ რაღაც პლატფორმები იქმნებოდა. რა თქმა უნდა, ეს ყველაფერი დროებითია, როგორ შეიძლება მათ შორის რაიმე ერთობა, როცა სხვადასხვა მსოფლმხედველობა აქვთ. რა განწყობა და დამოკიდებულება აქვთ ერთმანეთის მიმართ იკვეთება იმ განცხადებებშიც, რასაც მათი ლიდერების მხრიდან ვისმენთ“, – განაცხადა კახა კალაძემ.

თბილისის მერის თქმით, ოპოზიცია იმოქმედებს ისე, როგორც თავიანთი პატრონები გარედან ეტყვიან.

„არ მინდა, მათ პოლემიკაში შევიდე, თუ ვინ იღებს ან არ იღებს მონაწილეობას არჩევნებში. ეს არ არის ჩვენი საქმე. რაც შეეხება ჩვენს გუნდს, მზადება გვაქვს დაწყებული ადგილობრივი თვითმმართველობის არჩევნებისთვის.

ბოლო წლების განმავლობაში მნიშვნელოვანი პროექტები განხორციელდა როგორც დედაქალაქში, ისე რეგიონებში, თუმცა ბევრი პრობლემა რჩება, არსებობს გამოწვევები. ამ ყველაფერს სჭირდება ღირსეული პასუხი. საზოგადოებას უნდა ვუთხრათ, რას ვგეგმავთ და როგორ ვაპირებთ მათ მოგვარებას.

მე მგონია, რომ ოპოზიციას რასაც თავიანთი პატრონები გარედან ეტყვიან, ისე მოიქცევიან“, – აღნიშნა კახა კალაძემ.

ინფორმაციას თბილისის მერიის პრესცენტრი ავრცელებს

“დღევანდელ შეხვედრაზე ყველა მონაწილე ვთანხმდებით ერთ რამეზე – საქართველო ივანიშვილის გარეშე, ივანიშვილის პირობებში საქართველოში არანაირი არჩევნები არ იქნება”, – განაცხადა “ერთიანობა ნაციონალური მოძრაობის” პოლიტსაბჭოს თავმჯდომარემ, ლევან ხაბეიშვილმა ოპოზიციის შეხვედრის დასრულების შემდეგ:

“მნიშვნელოვანია ყველას ესმოდეს, რომ სანქცირებული ივანიშვილი სანქცირებული კალანდარიშვილით საქართველოში არჩევნებს არასდროს არ ჩაატარებს, შესაბამისად უკვე რომ გარკვეულ ჯგუფებს დაწყებული აქვთ მზადება ე.წ. არჩევნებში მონაწილეობისთვის, ეს არანორმალურია.

ამიტომ აქ პოლიტიკური პარტიების, სამოქალაქო სექტორის წარმომადგენლები ვთანხმდებით ერთ რამეზე – საქართველო ივანიშვილის გარეშე, ივანიშვილის პირობებში საქართველოში არანაირი არჩევნები არ იქნება, ეს იქნება უბრალოდ სპექტაკლი, სადაც ის სხვადასხვა მსახიობებს შესთავაზებს როლებს, ზოგი დაირქმევს რომ პოლიტიკოსია, ზოგი მერობის კანდიდატი.

ჩვენი მიზანია ივანიშვილის დამხობა და ამის შემდეგ არჩევნების ჩატარება, სადაც ხალხი გადაწყვეტს ვინ იქნება ხელისუფლებაში, ვინ კოალიციაში და ა.შ.” – განაცხადა ლევან ხაბეიშვილმა.

ინფორმაციას “ერთიანობა ნაციონალური მოძრაობის” პრესცენტრი ავრცელებს

ტელეკომპანია “კავკასია”-ს გენერალური დირექტორი, ნინო ჯანგირაშვილი, ირონიული მინიშნებით, თავის ვარაუდს გამოთქვამს მთავრობის მეთაურ, ირაკლი კობახიძესთან დაკავშირებით:

“წინ ძალიან დრამატული თვეები გველის და მაგრად უნდა დავდგეთ, ოღონდ არ ინერვიულოთ, ბოლო სერიაში კობახიძე ტიტლიკანა დარბის ქუჩაში და ბუტბუტებს დიფსთეითი, დიფსთეითი, დიფსთეითი, დიფსთეითი, დიფსთეითი… ოღონდ თბილისის ქუჩებში არა, მოსკოვის ქუჩებში დარბის“, – წერს ნინო ჯანგირაშვილი ფეისბუქის პირად გვერდზე.

31 მაისიდან “FARA” ძალაში შევა და კონკრეტულ ადგილობრივი თუ საერთაშორისო ორგანიზაციის, მედიისა თუ კომპანიის წარმომადგენლებს მოუწევთ გადაწყვეტილება მიიღონ – დარეგისტრირდებიან თუ არა მმართველი პარტიის მიერ მიღებული კანონის შესაბამისად. აღნიშნულთან დაკავშირებით თავის პოზიცია-შეთავაზებას აფიქსირებს ჟურნალისტი მერაბ მეტრეველი:

“იმედია, დამოუკიდებელი ენჯეოები და მედიები არც დარეგისტრდებით და არც საქმიანობას შეწყვეტთ.

მესმის, რომ ეს კანონი წინასგან გასხვავებით ციხეს ითვალსიწინებს, მაგრამ ზის მზია, სხედან აგერ აქციებზე დაკავებული ბავშვები და უძლებენ.

თან თუ ბევრი გამოიჩენს პრინციპულობას, დარწმუნებული ვარ, ამ კანონსაც ისევე ვერ აღასრულებენ, როგორც წინა ვერ აღასრულეს“, – წერს მერაბ მეტრეველი ფეისბუქის პირად გვერდზე.

შს მინისტრის თანამდებობიდან ვახტანგ გომელაურის წასვლას, კონკრეტული მოსაზრებებით, ეხმაურება და მთავრობის მეთაურის პასუხისმგებლობაზე აკეთებს მინიშნებას “ქრონიკა +”-ის მთავარი რედაქტორი, ელისო კილაძე:

“ვახტანგ გომელაური თანამდებობიდან გადადგა.

ბიძინა ივანიშვილის ბოლო კადრი გავიდა მთავრობიდან.

სრული პასუხისმგებლობა დარჩა ირაკლი კობახიძეს.

მარტო მოუწევს დიფ სფეიტთან ბრძოლა.

დაპირისპირება ხელისუფლებაში გადმოინაცვლებს ქუჩაში!

მარტივი არ იქნება‼️” – წერს ელისო კილაძე ფეისბუქის პირად გვერდზე.

„ურთიერთობების გადატვირთვა პრინციპულად მნიშვნელოვანია, იმიტომ, რომ ის დამოკიდებულება, რაც იყო წლების განმავლობაში, კატეგორიულად მიუღებელია – აშშ უნდა იყოს ჩვენი სტრატეგიული პარტნიორი, ჩვენი მეგობარი და არა მბრძანებელი“, – ამის შესახებ თბილისის მერმა კახა კალაძემ დღეს ჟურნალისტებთან საუბრისას აშშ-ის მიერ გამოქვეყნებულ განცხადებაზე დასმული კითხვის პასუხად განუცხადა.

როგორც დედაქალაქის მერმა აღნიშნა, საელჩოს განცხადებას, სადაც საუბარია იმაზე, რომ „ქართული ოცნება – დემოკრატიული საქართველოს“ დამფუძნებელმა ბიძინა ივანიშვილმა უარი თქვა აშშ-ის ელჩ დეგნანთან შეხვედრაზე, ივანიშვილი თავად უპასუხებს.

„მე დარწმუნებული ვარ, ბატონი ბიძინა თავად გააკეთებს განმარტებას ამასთან დაკავშირებით, თუმცა მე გეტყვით ჩემს პირად დამოკიდებულებას: ჩვენ არაერთხელ გვითქვამს და კიდევ ერთხელ მინდა, დავადასტურო, რომ პრინციპულად მნიშვნელოვანია ურთიერთობის ახალი ფურცლიდან დაწყება. ჩვენ ამას მხოლოდ და მხოლოდ მივესალმებით.

ურთიერთობების გადატვირთვა პრინციპულად მნიშვნელოვანია, იმიტომ, რომ ის დამოკიდებულება, რაც იყო წლების განმავლობაში, კატეგორიულად მიუღებელია. აშშ უნდა იყოს ჩვენი სტრატეგიული პარტნიორი, ჩვენი მეგობარი და არა მბრძანებელი.

რა თქმა უნდა, მნიშვნელოვანია, რომ აღდგეს ურთიერთობები, ჩვენ ამას მხოლოდ და მხოლოდ მივესალმებით, მაგრამ ეს უნდა იყოს მეგობრული და პარტნიორული“, – განაცხადა კახა კალაძემ.

ამასთან, მერმა ხაზი გაუსვა, რომ აშშ-ის მიერ სანქცირებულია რამდენიმე თანამდებობის პირი, ასევე, ბიძინა ივანიშვილი.

„როდესაც სანქცირებულია ჩვენი ქვეყნის რამდენიმე თანამდებობის პირი, დასანქცირებულია ბატონი ბიძინა ივანიშვილი, თან რის გამო? იმისთვის, რომ დავიცავით ჩვენი ქვეყნის ინტერესები და არავის მივეცით შესაძლებლობა, რომ იგივე პროცესები წარმართულიყო საქართველოში, რაც მოხდა უკრაინასთან მიმართებაში. ჩვენ ვიცავთ ჩვენი ქვეყნის ინტერესს, არავის ვერძით და ვებრძვით, ვიცავთ საკუთარ ქვეყანას და ხალხს, ჩვენი ქვეყნის მომავალს.

თქვენ ნახეთ გუშინ აშშ-ის პრეზიდენტის მილოცვა პრეზიდენტ ყაველაშვილის მიმართ, ქართველი ხალხის მიმართ და ამას, რა თქმა უნდა, მივესალმებით. მნიშვნელოვანია, რომ ურთიერთობები დაიწყოს ახალი ფურცლიდან“, – განაცხადა კახა კალაძემ.

ინფორმაციას თბილისის მერიის პრესცენტრი ავრცელებს

“სტრატეგია აღმაშენებლის” ერთ-ერთი ლიდერი, პაატა მანჯგალაძე “ქართული ოცნების” ხელისუფლების საკადრო ცვლილებებთან დაკავშირებით პოლიტიკურ შეფასებებს აკეთებს:

“ჯერ ღარიბაშვილი და ლილუაშვილი, ახლა გომელაური – ეს უბრალოდ საკადრო ცვლილება არ არის. ეს ბიძინა ივანიშვილის რეჟიმის შიდა რყევების და კრიზისის ნიშანია.

როდესაც სისტემას ტოვებენ ივანიშვილის ყველაზე ერთგული, ინფორმირებული და გავლენიანი ფიგურები, მხოლოდ ორი ახსნა რჩება:

პირველი, ან ისინი ტოვებენ სისტემას, რომ მომავალში თავიანთი გადარჩენა უზრუნველყონ, გრძნობენ, რომ გემი იძირება.

ან მეორე, თავად რეჟიმი ხვდება, რომ არსებული სტატუს-კვოთი ვეღარ ინარჩუნებს ძალაუფლებას და იწყებს გადაჯგუფებას, დროის მოსაგებად.

ორივე შემთხვევაში ფაქტი ერთია, რეჟიმს უჭირს და იწყებს შიგნიდან ჩამოშლას, კრიზისი რეალურია.

ეს უკვე ნანახი გვაქვს: სერბეთი, 2000 წელი – მილოშევიჩის რეჟიმი დაიშალა მას შემდეგ, რაც ძალოვან სტრუქტურებში შიდა რყევები და გადადგომები დაიწყო. რეჟიმი მალე დაემხო.

საქართველო, 2003 წელი :

ვარდების რევოლუციამ იმიტომ იმუშავა, რომ ძალოვანი სტრუქტურების ხელმძღვანელების ნაწილი მანამდე გადადგა, ახალ დანიშნულების ნაწილმა კი შევარდნაძის მხარდაჭერა შეწყვიტა.

ტუნისი, 2011 წელი – როდესაც ძალოვანი უწყებების ხელმძღვანელებმა ბენ ალის რეჟიმის დატოვება დაიწყეს, სულ მალე დიქტატორი გაიქცა და რეჟიმი ჩამოიშალა.

ახლა უკვე ყველაფერი ჩვენზეა, ეს კრიზისი რეალურ გამარჯვებად უნდა ვაქციოთ.

საქართველოს მომავალი არ ეკუთვნის შიშზე აშენებულ ერთი კაცის ავანტიურას, რომელიც საკუთარი კეთილდღეობისა და უსაფრთხოების გამო წირავს ადამიანებს.

ეს ქვეყანა ეკუთვნის თავისუფლების მოყვარე ხალხს და მათი გამარჯვების რწმენას!” – აცხადებს პაატა მანჯგალაძე.

ინფორმაციას “სტრატეგია აღმაშენებლის” მედიასთან და საზოგადოებასთან ურთიერთობის სამსახური ავრცელებს