თანამდებობის პირებისა თუ, კერძოდ, საქართველოს მთავრობის წევრების, კონკრეტულად კი კონკრეტულად რეგიონალური განვითარებისა და ინფრასტრუქტურის მინისტრის, მაია ცქიტიშვილის საქმიანობის შეფასებისას, თავისებური მოსაზრება ჰქონდა საზოგადოებრივი მოძრაობა “ლელოს” დამფუძნებელ მამუკა ხაზარაძეს:

“ადამიანები იკავებენ ისეთ თანამდებებს, რომლის აზრზეც არ არიან.

ნებისმიერ ვგულისხმობ, თუნდაც მაია ცქიტიშვილს, რომელსაც წარმოდგენა არ აქვს რა არის ინფრასტრუქტურა. შეიძლება კარგად აცხობს ხაჭაპურებს, მაგრამ მე არ ვიცი რა გამოცდილება ჰქონდა მას, წინა ცხოვრებაში, როცა ამ მილიონებს აბარებენ.

შეიძლება ეს იმით იყო გამოწვეული, რომ ბიძინა ივანიშვილს ჰგონია, მაია ცქიტიშვილის ხელში თანხა არ დაიკარგება კორუფციული თვალსაზრისით, მაგრამ მე მას ვურჩევ, რომ მაია ცქიტიშვილის ქვემოთ ჩაიხედოთ როგორ მიდის ტენდერები, ჰკითხოთ კერძო კომპანიებს, თუ რანაირი ტიპის კორუფციაა ინფრასტრუქტურის სისტემაში“, – განაცხადა მამუკა ხაზარაძემ.

2 ოქტომბერს, დედაქალაქის მთავრობის სხდომაზე თბილისის მერმა სამშენებლო ნარჩენების უკანონო დაყრასთან დაკავშირებით, საჯარიმო სანქციების გაზრდა დაანონსა:

“კანონპროექტი უკვე მზად არის.

ყველაზე დიდ პრობლემებს სამშენებლო ნარჩენები ქმნის, რადგან სამშენებლო ობიექტების მხრიდან, ხშირ შემთხვევაში, ნარჩენების განთავსება სპეციალურად გამოყოფილ ადგილებში არ ხდება. აქამდე ფიზიკური პირის შემთხვევაში, ჯარიმა ერთ კუბურ მეტრამდე სამშენებლო ნარჩენის დაყრაზე, ფიზიკური პირის შემთხვევაში იყო 200 ლარი, ხოლო იურიდიული პირის შემთხვევაში 500 ლარი. საკანონმდებლო ინიციატივა კი ითვალისწინებს მის გაზრდას ფიზიკურ პირზე 1000 და იურიდიულ პირზე 3000 ლარამდე. ძველი კანონმდებლობით, ერთი კუბური მეტრი და მეტი მოცულობის სამშენებლო და სხვა ინერტული ნარჩენების დაყრაზე ჯარიმა ფიქსირებული იყო და ფიზიკური პირის შემთხვევაში, 500 ლარს წარმოადგენდა, ხოლო 1 500 ლარს – იურიდიული პირის შემთხვევაში. ამ საკანონმდებლო ინიციატივით ჩვენ ვაკეთებთ გრადაციას, რომლის მიხედვით, ერთიდან 10 კუბურ მეტრამდე ჯარიმა ფიზიკურ პირისთვის იქნება 3 000 ლარი, ხოლო იურიდიული პირისთვის 6 000 ლარი. 10-დან 50 კუბურ მეტრამდე სამშენებლო ან სხვა ინერტული ნარჩენების დაყრაზე ჯარიმა იქნება ფიზიკური პირისთვის 10 000 ლარი, ხოლო იურიდიული პირისთვის – 30 000 ლარი. 50 ან 50-ზე მეტი კუბური მეტრის შემთხვევაში, ჯარიმა ფიზიკური პირისთვის იქნება 30 000 ლარი, ხოლო იურიდიული პირისთვის 50 000 ლარი. აღნიშნული საკანონმდებლო ინიციატივა პარლამენტს უახლოეს მომავალში წარედგინება.

კლინიკებთან ახლოს განთავსებულ საყოფაცხოვრებო ნარჩენების კონტეინერებში სახიფათო სამედიცინო ნარჩენების განთავსების შემთხვევაში, ფიზიკური პირებისთვის ჯარიმა დაახლოებით, 12-ჯერ იზრდება, ხოლო იურიდიული პირებისთვის ათმაგი ოდენობის ხდება. სამედიცინო ნარჩენები, რომელიც საყოფაცხოვრებო ნარჩენების ურნაში იყრება, ეპიდემიის გავრცელების პირველწყაროა, რაც კატეგორიულად მიუღებელია. თუ აქამდე დამრღვევი ფიზიკური პირი 400 ლარით
ჯარიმდებოდა, ახლა ის 5 000 ლარით დაჯარიმდება. იურიდიული პირი აქამდე ჯარიმდებოდა 1 000 ლარით და ახლა 10 000 ლარით დაჯარიმდება. მინდა, დავავალო მუნიციპალურ ინსპექციას, რომ მაქსიმალური ყურადღება გაამახვილოს ამ მიმართულებით“, – განაცხადა კახა კალაძემ.

საქართველოს ყოფილი პრეზიდენტი მიხეილ სააკაშვილი თავის მიმართვას ავრცელებს და ტრადიციული ფასეულებებთან ერთად პროგრესისა და ინოვაციების მნიშვნელობაზე ამახვილებს ყურადღებას. მიხეილ სააკაშვილი ასევე აღნიშნავს, რომ ახლა არაა დაპირისპირების დრო და ყველას გაერთიანებისკენ მოუწოდებს:

“მოდით ვიყოთ გულწრფელები, ყველა ვინც ქადაგებს ამ “სვეცკური”, ვითომ პროგრესული, ქართული ტრადიციული ცნობიერებისაგან მოწყვეტილი ფასეულობებით, დღეს რეალურად, უნებლიედ (გაცნობიერებულად პუტინის სამსახურში ყოფნას ნუ დავაბრალებთ) პუტინის საქმეს აკეთებს, იმიტომ რომ ქართული საზოგადოების სრულ უმრავლესობას ზურგს აქცევს, დასცინის, შავებად და ბნელებად ნათლავს და საალაფოდ უტოვებს პუტინის ქვეშევრდომებს – ვასაძეებს, “ქართულ მარშებს” და ასე შემდეგ…

ნახეთ რა პარადოქსი მივიღეთ შედეგად – ყველა სინამდვილეში პრორუსული ძალა ქადაქებს და სპეკულირებს ეროვნული, ტრადიციული ფასეულობებით და ყველა დასავლური ორიენტაციის პროგრესული საღი ძალა უნებლიე, თავსმოხვეულ კონფლიქტშია ქართულ ტრადიციულ ფასეულობებთან…

ეს არის კატასტროფა, ეს არის ზუსტად ის რაც პუტინს და ივანიშვილს აწყობთ.

არადა მე მჯერა, რომ შეგვიძლია ვიყოთ პროგრესულები მაგრამ ამავე დროს არ მოვწყდეთ ჩვენს ეროვნულ ფესვებს. შეგვიძლია ვისწრაფოდეთ დასავლეთისკენ, მაგრამ ამით არ შევაქციოთ ზურგი ჩვენს სიწმინდეებს.

სწორედ პუტინს უნდა დანერგოს განცდა, რომ პროდასავლურობა ეროვნულობისთვის ზურგის შექცევას ნიშნავს. არადა ეს ასე სულაც არ არის – პირიქით…

რა თქმა უნდა ჩვენ ვართ ძალიან ინოვაციურები, ყველაზე ბევრი იდეა გვაქვს, საინტერესო იდეა გვაქვს, გათანამედროვების იდეა გვაქვს.

მე ვფიქრობ, აქ არ არის ვინმესთან პიროვნულ დაპირისპირებაზე საუბარი. სიმართლე უნდა ითქვას და რაღაც მომენტში ხალხს უნდა გაეგო სიმართლე, რაც არის ფუნდამენტური განსხვავება. მაგრამ ეს არ ნიშნავს, რომ ჩვენ არ ვითანამშრომლებთ ყველასთან. ჩვენ ვითანამშრომლებთ ყველასთან, საერთო უბედურების წინააღმდეგ.

რა თქმა უნდა მე პატივს ვცემ ყველას მოსაზრებას, ყველას შეხედულებას, თუ ეს საქართველოს ინტერესებშია და ადამიანი მოქმედებს საერთო ფრონტით. ჩვენ ბევრი გამოწვევა გვაქვს, ჩვენ ბევრი საფრთხე გვაქვს და ახლა დრო არა გვაქვს რესურსების დაბნევის და ერთმანეთთან ქიშპობის…

ძალა ერთობაშია!

საქართველოში უნდა გათენდეს!“, – მიმართა საქართველოს საზოგადოებას მიხეილ სააკაშვილმა.

პროექტი, რომელმაც საზოგადოებაში ინტერესი გამოჩენისთანავე ჰპოვა, ღია სივრცეში პირველ ოქტომბერს გამოჩნდა. სტრატეგია “აღმაშენებლის” სახელით ცნობილი ქვეყნის განვითარების გეგმა “პოლიტიკური პლატფორმა – ახალი საქართველოს” თავმჯდომარემ და პროექტის ავტორმა ფილარმონიის დარბაზიდან წარადგინა. გიორგი ვაშაძემ დამსწრე საზოგადოებას გააცნო 15 პუნქტიანი გეგმა, რომელიც ჩვენი ქვეყნის სწრაფი განვითარებისთვის შეიქმნა, საქართველოს ისტორიული პოლიტიკური ნაბიჯებისა და 20 სხვადასხვა ქვეყნის გამოცდილებაზე დაყრდნობით. სტრატეგია “აღმაშენებელზე” ორმოცდაათამდე ქართველმა და უცხოელმა ექსპერტმა იმუშავა.

“ახალი საქართველოს” ლიდერმა ასევე აღნიშნა, რომ 1 ოქტომბრიდან ყოველკვირეულად, პროექტზე მომუშავე გუნდის წევრები, ქვეყნის სწრაფი განვითარების ინოვაციურ გეგმას და უკეთესი მომავლის სტრატეგიას გააცნობს საზოგადოებას. ხედვას, რომელიც აერთიანებს ქართველ ერს:

“სტრატეგია აღმაშენებელი სამ ძირითად ფასეულობას ატარებს, ესენია: ძლიერი ადამიანი! ძლიერი ოჯახი! ძლიერი საქართველო!

ჩვენ შეგვიძლია მივაღწიოთ წარმატებას, მთავარია დავიწყოთ აღმშენებლობის იდეის პროცესი, სადაც ყველა საქართველოს მოქალაქე იქნება ჩართული. ჩვენ უნდა მოვახდინოთ იმ ნიჭის მობილიზება, რომელიც მსოფლიოს სხვადასხვა წერტილშია გაფანტული და გამოვიყენოთ საქართველოს განვითარებისთვის.

სტრატეგია “აღმაშენებლის” გუნდის მიერ შემუშავებული გეგმა არის არა გადმოტანილი და კოპირებული, არამედ სრულიად ახალი, ინოვაციური და რაც მთავარია ქართულ რეალობაზე დაფუძნებული.

საქართველოს წარმატებული მომავლის გეგმას, რომელსაც სტრატეგია “აღმაშენებელი” ეწოდა, ორმოცდაათამდე ქართველი და უცხოელი ექსპერტი მუშაობდა. ასევე, შევისწავლეთ ოცი ყველაზე განვითარებული ქვეყნის მაგალითი.

ჩვენ რეალურად გვაქვს შესაძლებლობა ავაშენოთ წარმატებული საქართველო და ამისთვის საჭიროა შევიმუშავოთ წარმატებისა და განვითარების ქართული მოდელი. საჭიროა სტრატეგიის ირგვლივ ქართველი ერის გაერთიანება“, – განაცხადა გიორგი ვაშაძემ.

გასული წლის თებერვალში, სასტიკი მეთოდებით მოკლული 20 წლის ანა ნაცვლიშვილის  მამა, მამუკა ნაცვლიშვილი, მსჯავრდებული ლადო გრიგალაშვილის ადვოკატის ნაიარა ოტიაშვილის დაკავებას ეხმაურება. შვილმოკლული მამა აცხადებს, რომ ბრალდებულის ადვოკატი მის შვილს უღირსად სწამებდა ცილს.

„არავის ციხეში ჩასმას და არავის სიკვდილს ქრისტიანი ადამიანი არ ისურვებს, მაგრამ ეს ქალი ციხიდან გამოსაშვები არ არის. სულ მცირე მას საადვოკატო ლიცენზია უნდა ჩამოერთვას. მან ჩემ შვილზე ისეთ რაღაც ილაპარაკა, რაც არც კანონით და არც ეთიკითაა გამართლებული.

ეს არ არის ისეთი ადამიანი, ვის გამოც შეიძლება გამოხვიდე, გაამართლო და მხარი დაუჭირო. ეს შეიძლება მხოლოდ ოჯახის წევრმა გააკეთოს და მისი ციხეში ჩასმა არ მოისურვოს. მივმართავ ადვოკატებს, რომლებიც მას იცავენ და გულშემატკივრობენ, გადახედეთ ნაირა ოტიაშვილის საქმიანობას. თუნდაც, ჩემი შვილის საქმეში მის როლს. ჩემი შვილის ცხედარი გაციებულიც არ იყო, ჩირქი რომ მოსცხო. ამის დამადასტურებელი ფაქტებიც მაქვს. თუ საჭირო იქნება, სასამართლოშიც წარვდგები ჩვენების მისაცემად“, – განაცხადა მამუკა ნაცვლიშვილმა.

გასული წლის 22 თებერვალს რამდენიმესაათიანი ძებნის შემდეგ 20 წლის ანა ნაცვლიშვილის ცხედარი, ოჯახმა და ახლობლებმა, სახლთან ახლოს მიტოვებულ ავტოსადგომებთან მიაგნეს. იგი სასტიკი წამებით იქნა მოკლული, რისთვისაც ბრალდებულად (რომელიც ამჟამად უკვე მსჯავრდებულია) ცნობილი იქნა მისი შეყვარებული ლადო გრიგალაშვილი.

“ნაციონალური მოძრაობის” წინააღმდეგ მორიგ გალაშქრებას ახდენს ინტერნეტგამოცემა “ტაბულას” დამფუძნებელი და მთავარი რედაქტორი თამარ ჩერგოლეიშვილი:

“ლიბერალური დემოკრატიის მამოძრავებელი ძალა არის ინფორმირებული ამომრჩეველი.

ენმ-ის ლუსტრაცია არის ძალიან, ძალიან კარგი ქართული დემოკრატიისთვის.

აი ამისთვისაა კამათი კარგი – კამათში ვლინდება ჭეშმარიტება.

ევროპული საქართველოს ერთ-ერთი ლიდერი, თბილისის ყოფილი მერი გიგი უგულავა, გაეროს შტაბბინაში საქართველოსა და რუსეთის საგარეო საქმეთა მინისტრების შეხვედრას ეხმიანება და საკმაოდ ორიგინალურ, ირონიზირებულ შეფასებას აძლევს მას:

“კაცი (მხედველობაშია სერგეი ლავროვი, რედ.) ამბობს ზალკალიანი მოვიდა ფაქტიურად შალახოს საცეკვავადო😂🙈. თვითონ ითხოვა შეხვედრა, მარტო ავიამიმოსვლა აინტერესებდაო. მეც ვუთხარი, რომ თუ ერთ ადგილს დააყენებთ, იქნებაო. დამპირდა ანტირუსებს ავლაგმავთო [ანუ ზალკალიანი ჩვენ👀]. ვერ გავიგე, რას ბაქიბუქობს ეს კაცი კომენტარებშიო. შეხვედრაზე გრძელი კომენტარები მისცაო. კაცი პირდაპირ ამბობს, რომ ფრენების შეწყვეტა პოლიტიკური გადაწყვეტილებააო. ეს კი იციან რუსებმა-ერთ აბზაცში მოგსპობენ. ვაი ბედკრულო საქართველო…” – წერს ფეისბუკის პირად გვერდზე გიგი უგულავა.

როგორც დედაქალაქის მერია იტყობინება, თბილისობის დღესასწაულზე, 5 და 6 ოქტომბერს გარევაჭრობა ნებადართულია მხოლოდ სპეციალურად გამოყოფილ ადგილებში

გლდანის რაიონი
მუხიანი
ნ. დუმბაძის გამზირი, II მ/რ, მე-18 კორპუსის მიმდებარედ

საქართველოს მთავრობის სხდომაზე ქვეყნის 2020 წლის ბიუჯეტის პროექტი განიხილეს. ბიუჯეტში გათვალისწინებულია ყველა პენსიონერისთვის, ასევე 18 წლამდე ასაკისა და პირველი და მეორე ჯგუფის შეზღუდული შესაძლებლობების მქონე პირებისთვის 20 ლარით პენსიის ზრდა, – ამის შესახებ საქართველოს პრემიერ-მინისტრმა გიორგი გახარიამ მთავრობის სხდომაზე განაცხადა.

მთავრობის მეთაურის განმარტებით, პირველი ივლისიდან 70 წელს გადაცილებული პენსიონერებისთვის დამატებით პენსიის 30 ლარით ზრდა მოხდება, რაც იმას ნიშნავს, რომ მომავალი წლის ბიუჯეტში ამ ჯგუფის მოქალაქეებს პენსია  50 ლარით გაეზრდებათ.

„გარდა ამისა, მინდა მოგახსენოთ, რომ სრულ განაკვეთზე მყოფი მასწავლებლების ანაზღაურება იზრდება როგორც მიმდინარე,  ასევე მომავალი სასწავლო წლის დასაწყისში. რაც ნიშნავს იმას, რომ 2020 წლის სასწავლო წლისთვის მასწავლებლების ხელფასი გაიზრდება 300 ლარით“, – განაცხადა გიორგი გახარიამ.

მთავრობის მეთაურმა იმ ძირითად პრინციპებზე გაამახვილა ყურადღება, რასაც 2020 წლის ბიუჯეტი ეყრდნობა.

„პირველ რიგში ეს გახლავთ მოქალაქეზე ორიენტირებული, მოქალაქისთვის მეტი შესაძლებლობების შექმნის და მოქალაქისადმი სოციალური პასუხისმგებლობის ბიუჯეტი. ასევე პრიორიტეტად რჩება ეკონომიკური განვითარებისთვის კრიტიკულად მნიშვნელოვანი ინფრასტრუქტურული პროექტები და ესეც, რა თქმა უნდა ხელს უნდა უწყობდეს ჩვენი ეკონომიკის ეფექტიანობის ზრდას. მესამე ძირითადი პრინციპი გახლავთ ბიუჯეტის ეფექტიანი მართვა. აქ ვერ იქნება ვერანაირი კომპრომისი. ამიტომ, კოლეგებო ყველა ის ძირითადი ვალდებულება, რომელიც თქვენს სამინისტროებს გააჩნიათ ამ ბიუჯეტით, უნდა იყოს შესრულებული დროულად და ეფექტიანად. გარდა ამისა, კიდევ ერთი კრიტიკულად მნიშვნელოვანი პრინციპი, ბიუროკრატიული ხარჯების, როგორც მინიმუმ არ გაზრდა და იქ სადაც ეს შესაძლებელია, ბიუროკრატიული ხარჯების ეფექტიანი მართვით შემცირება“, – აღნიშნა გიორგი გახარიამ.