როგორც ცნობილია 11 იანვარს მმართველი პარტიის თავმჯდომარემ, ბიძინა ივანიშვილმა თანამდებობისა და პარტიის დატოვების თაობაზე განცხადება გაავრცელა, შესაბამისად გადაწყდა, რომ 16 იანვარს გამართულიყო პარტიის რიგგარეშე ყრილობა.

დღეს გაიმართა “ქართული ოცნების” მე-6 ყრილობა. ყრილობამ პარტიის თავმჯდომარედ აირჩია ირაკლი კობახიძე, გენერალურ მდივნად კახა კალაძე, ხოლო პარტიის თავმჯდომარის მოადგილედ ვასილ მაღლაფერიძე. არჩეულია ასევე პარტიის 21 წევრისგან შემდგარი პოლიტიკური საბჭო, სადაც შევიდნენ „ქართული ოცნება – დემოკრატიული საქართველოს“ შემდეგი წევრები:

🔹 ირაკლი კობახიძე – მოქალაქეთა პოლიტიკური გაერთიანება „ქართული ოცნება – დემოკრატიული საქართველოს“ თავმჯდომარე
🔹 კახა კალაძე – პარტიის გენერალური მდივანი და პოლიტიკური საბჭოს წევრი
🔹 ვასილ მაღლაფერიძე – პარტიის თავმჯდომარის მოადგილე და პოლიტიკური საბჭოს წევრი
🔹 გიორგი გახარია – პარტიის პოლიტიკური საბჭოს წევრი, საქართველოს პრემიერ-მინისტრი
🔹 არჩილ თალაკვაძე – პოლიტიკური საბჭოს წევრი, საქართველოს პარლამენტის თავმჯდომარე
🔹 მაია ცქიტიშვილი – პოლიტიკური საბჭოს წევრი, რეგიონული განვითარებისა და ინფრასტრუქტურის მინისტრი, ვიცე-პრემიერი
🔹 გიორგი ვოლსკი – პოლიტიკური საბჭოს წევრი, პარლამენტის პირველი ვიცე-სპიკერი
🔹 ირაკლი ღარიბაშვილი – პოლიტიკური საბჭოს წევრი, საქართველოს თავდაცვის მინისტრი
🔹 თეა წულუკიანი – პარტიის პოლიტიკური საბჭოს წევრი, პარლამენტის განათლების, მეცნიერებისა და კულტურის კომიტეტის თავმჯდომარე
🔹 მამუკა მდინარაძე – პოლიტიკური საბჭოს წევრი, პარტიის საპარლამენტო ფრაქციის თამჯდომარე
🔹 კახაბერ კუჭავა – პოლიტიკური საბჭოს წევრი, საქართველოს პარლამენტის თავმჯდომარის მოადგილე
🔹 ვახტანგ გომელაური – პოლიტიკური საბჭოს წევრი, შინაგან საქმეთა მინისტრი
🔹 ეკატერინე ტიკარაძე – პოლიტიკური საბჭოს წევრი, საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრი
🔹 ივანე მაჭავარიანი – პოლიტიკური საბჭოს წევრი, საქართველოს ფინანსთა მინისტრი
🔹 მაკა ბოჭორიშვილი – პოლიტიკური საბჭოს წევრი, პარლამენტის ევროპასთან ინტეგრაციის კომიტეტის თავმჯდომარე
🔹 შალვა პაპუაშვილი – პოლიტიკური საბჭოს წევრი, პარლამენტის განათლების, მეცნიერებისა და კულტურის კომიტეტის თავმჯდომარის პირველი მოადგილე
🔹 მარიამ ქვრივიშვილი – პოლიტიკური საბჭოს წევრი, პარლამენტის ევროპასთან ინტეგრაციის კომიტეტის თავმჯდომარის პირველი მოადგილე
🔹 ნიკოლოზ სამხარაძე – პოლიტიკური საბჭოს წევრი, პარლამენტის საგარეო ურთიერთობათა კომიტეტის თავმჯდომარე
🔹 სოზარ სუბარი – პოლიტიკური საბჭოს წევრი, პარლამენტის რეგიონული პოლიტიკისა და თვითმმართველობის კომიტეტის თავმჯდომარე
🔹 დიმიტრი სამხარაძე – პოლიტიკური საბჭოს წევრი, პარტიის რეგიონული მდივანი, პარლამენტის წევრი
🔹 თორნიკე რიჟვაძე – პოლიტიკური საბჭოს წევრი, აჭარის ავტონომიური რესპუბლიკის მთავრობის თავმჯდომარე

შსს-ზე გავლენის მოპოვებაზე ოცნებობდა ირაკლი კობახიძეო, წერს სოციალურ ქსელში “ქრონიკა +”-ის მთავარი რედაქტორი ელისო კილაძე და თავისი შეფასებით, “ქართულ ოცნებაში” შექმნილი რეალური სურათი წარმოადგინა:

“МВД უნდა დავითრიოთო, – ოცნებობდა კობახიძე და გომელაური პოლიტსაბჭოში დაუსვეს – “გაუიასნეს” ვინაა ამ “გასწინიცაში” დირექტორი…

ახლა მთავარია, ვასიკომ სადმე კონსპირაციულ ბინაში არ მიაძინოს😜

თავმჯდომარე არა სტაფილო…

ვინც არ იცის, МВД რას ნიშნავს, განვმარტავ – შინაგან საქმეთა სამინისტროა!

გომელაური მოხსნა კი არა, მოადგილედ ვასილ მაღლაფერიძეს გინიშნავენ, ოფისი რომ არ გადაწვა,” – წერს ელისო კილაძე ფეისბუქის პირად გვერდზე.

საქართველოს პარლამენტის განათლების, მეცნიერებისა და კულტურის კომიტეტის თავმჯდომარე თეა წულუკიანი და კომიტეტის წევრები გელათში ვიზიტით იმყოფებოდნენ.

ისინი ძეგლზე რამდენიმე წლის წინ დაწყებულ სარესტავრაციო სამუშაოებს ადგილზე გაეცნენ. ვიზიტის შემდეგ, ქუთაისის ეროვნული არქივის შენობაში გელათის მონასტრის კონსერვაცია-რესტავრაციის პროცესში გამოვლენილი ხარვეზების თაობაზე კომიტეტის სხდომა გაიმართა. დეპუტატებმა მოისმინეს კულტურული მემკვიდრეობის დაცვის ეროვნული სააგენტოს ხელმძღვანელის ნიკა ანთიძის მოხსენება და რესტავრატორ კახა ტრაპაიძის შექმნილ მდგომარეობასთან დაკავშირებით.

კომიტეტის სხდომას ასევე ესწრებოდნენ საზოგადოების წარმომადგენლები და დარგის დამოუკიდებელი სპეციალისტები. შეხვედრის დიდი ნაწილი გამოსავლის შესახებ მსჯელობას დაეთმო.

ინფორმაციას პარლამენტის საზოგადოებასთან ურთიერთობისა და ინფორმაციის დეპარტამენტი ავრცელებს

პოლიტიკის ექსპერტ ხათუნა ლაგაზიძეს მიაჩნია, რომ პარლამენტის “ქართული ოცნების” 90 დეპუტატი რეალურად უსახელგვარო პიროვნებები არიან, ისინი ბიძინა ივანიშვილის გამო აირჩიეს პარლამენტში და მმართველი პარტიის ლიდერის პოლიტიკიდან წასვლის შემდეგ ევროპელი პარტნიორების პოზიცია აინტერესებს პარლამენტის ლეგიტიმაციასთან დაკავშირებით:

“90 ბიძინა ივანიშვილი რომ აირჩია პარლამენტში “ოცნების” ამომრჩეველმა, ისე რომ პარლამენტში მსხდომების 90%-ის რეალური სახელი და გვარი მათივე ამომრჩევლის 90%-მა რომ არ იცის, ახლა როცა ივანიშვილი პოლიტიკიდან წავიდა როგორ იქნება ამ უსახელ-გვაროების ანუ სრულიად პარლიამენტის ლეგიტიმაციის საქმე?!

ევროპელები კი მოგვძახიან არჩევნები კონკურენტულად ჩატარდაო, მარა ვინც აირჩიეს ის წავიდა და ვინც დარჩა, ისინი რომ არ აურჩევიათ, მაგის საქმე როგორ იქნება, იქნებ ამაშიც დაგვაკვალიანონ ჩვენმა ევროპელმა მეგობრებმა,” – წერს ფეისბუქის პირად გვერდზე ხათუნა ლაგაზიძე.

მთავრობის მეთაური დღევანდელ სხდომაზე გამოეხმაურა სოფელ ბუკნარში მომხდარ ინციდენტებს. გიორგი გახარიას შეფასებით, რელიგიური მრავალფეროვნება ქვეყნის სიმდიდრეა და იქ, სადაც იქნება მცდელობა, ხელი შეეწყოს რელიგიურ ნიადაგზე მოქალაქეებს შორის დაპირისპირებას, სახელმწიფო იმოქმედებს უმკაცრესად:

„რელიგიური მრავალფეროვნება ისტორიული ფაქტია და ეს არის ჩვენი სიმდიდრე; ეს არის ის, როგორ ვაშენებდით ჩვენ საუკუნეების განმავლობაში ჩვენს სახელმწიფოს. საქართველოს მთავრობა იყო და იქნება გარანტი თითოეული მოქალაქისთვის, კონსტიტუციით მათთვის გარანტირებული უფლებების შესრულებისა.

ჩვენ არავის მივცემთ უფლებას, საქართველოს მოქალაქის უფლებები რაიმე სახით იყოს შეზღუდული, თუმცა ასევე არავის მივცემთ შესაძლებლობას, უკანონო ქმედებებით რაიმე სახის პროვოცირება გაუწიონ რელიგიურ ნიადაგზე ჩვენს მოქალაქეებს შორის დაპირისპირებას.

შინაგან საქმეთა სამინისტროს უკვე აქვს დავალება იმასთან დაკავშირებით, რომ იქ, სადაც იქნება ელემენტარული, მარტივი მცდელობა, ხელი შეეწყოს ან მოხდეს პროვოცირება რელიგიურ ნიადაგზე ჩვენს მოქალაქეებს შორის დაპირისპირებისა, სახელმწიფო და შინაგან საქმეთა სამინისტრო იმოქმედებს უმკაცრესად“, – აღნიშნა გიორგი გახარიამ.

საავტომობილო გზების დეპარტამენტი ინფორმაციას ავრცელებს ქვეყნის მასშტაბით უხვთოვლიანობის გამო შეზღუდული მოძრაობის აღსადგენად ჩატარებული გაწმენდითი სამუშაოების:

ჩატარებული გაწმენდითი სამუშაოების შედეგად, ნაქერალას უღელტეხილზე მისაბმელიანი და ნახევრადმისაბმელიანი ავტოტრანსპორტის მოძრაობა აღდგა და ამჟამად, შიდასახელმწიფოებრივი მნიშვნელობის ქუთაისი(მოწამეთა)-ტყიბული-ამბროლაურის საავტომობილო გზის კმ39-კმ60 (ნაქერალას უღელტეხილი) მონაკვეთზე, ყველა სახის ავტოტრანსპორტის მოძრაობა თავისუფალია.

ჩატარებული გაწმენდითი სამუშაოების შედეგად, საერთაშორისო მნიშვნელობის ახალციხე-ნინოწმინდის (სომხეთის რესპუბლიკის საზღვარი) საავტომობილო გზის კმ90-კმ112 მონაკვეთზე, ავტოტრანსპორტის მოძრაობა თავისუფალია.

ჩატარებული გაწმენდითი სამუშაოების შედეგად, შიდასახელმწიფოებრივი მნიშვნელობის ზუგდიდი-ჯვარი-მესტია-ლასდილის საავტომობილო გზის კმ182-კმ186 (კალა-უშგული) მონაკვეთზე, ავტოტრანსპორტის მოძრაობა თავისუფალია.

ინტენსიური თოვის გამო, შიდასახელმწიფოებრივი მნიშვნელობის ქუთაისი(მოწამეთა)-ტყიბული-ამბროლაურის საავტომობილო გზის კმ39-კმ60 (ნაქერალას უღელტეხილი) მონაკვეთზე, აკრძალულია მისაბმელიანი და ნახევრადმისაბმელიანი ავტოტრანსპორტის მოძრაობა, ხოლო დანარჩენი სახის ავტოტრანსპორტის მოძრაობა თავისუფალია.
გზის დანარჩენ მონაკვეთებზე ავტოტრანსპორტის მოძრაობა თავისუფალია.

ჩატარებული გაწმენდითი სამუშაოების შედეგად, შიდასახელმწიფოებრივი მნიშვნელობის ზუგდიდი-ჯვარი-მესტია-ლასდილის საავტომობილო გზის კმ70-კმ100 (ხაიში-ლახამულა) მონაკვეთზე ავტოტრანსპორტის მოძრაობა აღდგა.

როგორც საქართველოს განათლების, მეცნიერების, კულტურისა და სპორტის სამინისტრომ განაცხადა, ქვეყნის მასშტაბით ზოგადსაგანმანათლებლო სკოლებში 2020-21 სასწავლო წლის მეორე სემესტრი მინისტრის 27 ნოემბრის ბრძანების შესაბამისად გაგრძელდება:

“18 იანვარს სასწავლო პროცესი დისტანციური სწავლების სრულად ელექტრონული მოდელის გამოყენებით დაიწყება ქალაქებში: თბილისი, ქუთაისი, რუსთავი, თელავი, ზუგდიდი, ზესტაფონი, გორი, ფოთი, მარნეული და გარდაბანი. აჭარის ავტონომიური რესპუბლიკის ტერიტორიაზე მოქმედი ზოგადსაგანმანათლებლო დაწესებულებები სასწავლო პროცესს ასევე გააგრძელებენ დისტანციურ რეჟიმში.

ის სკოლები, სადაც მეორე სემესტრი საკლასო ოთახებში განახლდება, სამინისტრომ, კორონავირუსის პრევენციის მიზნით, სრულად უზრუნველყო პირბადეებით, დისტანციური, უკონტაქტო თერმომეტრებით, დეზობარიერითა და ზედაპირების სადეზინფექციო სითხეებით.

გარდა ამისა, სკოლებში კორონავირუსის შემთხვევების დადასტურების შემთხვევაში გაგრძელდება პირველ სემესტრში აპრობირებული მიდგომა წერტილოვანი შეზღუდვების შესახებ. ჯანდაცვის სამინისტროს მიერ დადგენილი წესების განხორციელების პროცესს განათლების სამინისტრო სისტემატურად დააკვირდება და განახორციელებს სკოლების მონიტორინგს.

აღსანიშნავია, რომ საქართველოში სასწავლო პროცესის განახლებასთან ერთად, დისტანციური სწავლების მიმართულებით ერთ-ერთი მთავარი რესურსის „ტელესკოლის“ მეორე სემესტრის საგაკვეთილო პროცესიც გაგრძელდება. საქართველოს განათლების, მეცნიერების, კულტურისა და სპორტის სამინისტროსა და საქართველოს პირველი არხის ერთობლივი საგანმანათლებლო პროექტი 18 იანვარს 09:00 საათიდან განახლდება.

პანდემიის პირობებში დისტანციური სწავლების ხელმისაწვდომობის უზრუნველყოფის მიზნით, საქართველოს მთავრობის ინიციატივით, განათლების, მეცნიერების, კულტურისა და სპორტის სამინისტრომ საქართველოში მოქმედ სამ მობილურ ოპერატორთან – სს „სილქნეტთან“, შპს „მაგთიკომთან“ და შპს „ვიონი საქართველოსთან“ (ბრენდი „ბილაინი“) ურთიერთთანამშრომლობის მემორანდუმს მოაწერა ხელი, რის საფუძველზეც საჯარო და კერძო სკოლების მოსწავლეები და მასწავლებლები ივნისის ბოლომდე შეღავათიანი მობილური ინტერნეტ პაკეტით ისარგებლებენ. მობილური ინტერნეტ პაკეტის შეღავათიან ტარიფს ასევე მხარი დაუჭირა საქართველოს კომუნიკაციების კომისიამ.

დისტანციური სწავლების გამოწვევებისა და ტექნიკური საჭიროებების შესაბამისად, ინტერნეტ პროვაიდერები მოსწავლეებსა და მასწავლებლებს 20GB მობილურ ინტერნეტპაკეტს 10 ლარად შესთავაზებენ, რაც სტანდარტულ ღირებულებასთან შედარებით 2,5-ჯერ ნაკლებია. დარგის ექსპერტების რეკომენდაციით, 20GB საკმარისი ოდენობაა ერთი თვის განმავლობაში ონლაინ გაკვეთილებზე დასასწრებად და ინტერნეტ რესურსების მოსაძიებლად“, – ნათქვამია განათლების სამინისტროს განცხადებაში.

პარტია “ერთიანი საქართველო – დემოკრატიული მოძრაობისა” და გენერალური მდივნის თანამდებობის დატოვების შესახებ ინფორმაციას სოციალური ქსელის მეშვეობით ავრცელებს გიგლა ბარამიძე:

“ძვირფასო მეგობრებო, მსურს გაცნობოთ, რომ ჩემი მოღვაწეობის ერთი ეტაპი დასრულდა. მე დავტოვე პარტია “ერთიანი საქართველო – დემოკრატიული მოძრაობა” და გენერალური მდივნის თანამდებობა.

მადლობა ჩემს კოლეგებს. ყველას გულით ვუსურვებ წარმატებებს. წინ საინტერესო დრო გველის…” – წერს გიგლა ბარამიძე ფეისბუქის პირად გვერდზე.