ანტისაოკუპაციო მოძრაობის ლიდერი, სამოქალაქო აქტივისტი დავით ქაცარავა ცხინვალის საოკუპაციო რეჟიმის მიერ დაპატიმრებული აქტივისტის, თამარ მეარაყიშვილის გათავისუფლების შესახებ ავრცელებს ინფორმაციას:
“თამარ მეარაყიშვილი, ახალგორელი აქტივისტი, რომელმაც ახალგორი 2008 წლის ოკუპაციის შემდეგ არ დატოვა და აგრძელებდა საოკუპაციო რეჟიმის წინააღმდეგ ბრძოლას, ოკუპანტებმა 2025 წლის 23 დეკემბერს, ჯაშუშობის ბრალდებით დააპატიმრეს.
მას 10-15 წლამდე პატიმრობა ელოდა.
ციხეში გადაყვანის შემდეგ, თამარმა მშრალი შიმშილობა გამოაცხადა და ოკუპანტებმა თამარი საავადმყოფოში გადაიყვანეს.
ცხადია, ბრალდება შეთითხნილ-შეკერილი იყო და საოკუპაციო რეჟიმმა არჩია, თამარ მეარაყიშვილი მოეშორებინა თავიდან.
ოკუპანტების საბოლოო გადაწყვეტილებით, თამარ მეარაყიშვილი “გამოაძევეს” ოკუპირებული სამაჩაბლოდან.
თამარი ამჟამად, საქართველოს არაოკუპირებულ ნაწილშია და ის თავისუფალია!” – წერს დავით ქაცარავა სოციალურ ქსელში.
