ერთჯერადად, 300 ლარიან დახმარების გამოყოფის თაობაზე ისაუბრა დედაქალაქის მთავრობის სხდომაზე თბილისის მერმა კახა კალაძემ. მისი განმარტებით დახმარებას მიიღებენ ლიცენზიის მფლობელი ტაქსების და ე.წ. ყვითელი მიკროავტობუსების მძღოლები.
“არსებული სიტუაციიდან გამომდინარე ძალიან ბევრი მიმართულება დაზარალდა, დაზიანდა და მათ შორის არიან ტაქსის მძღოლები, ე.წ. ყვითელი მიკროავტობუსების მძღოლები. აღნიშნულთან დაკავშირებით მიღებულია გადაწყვეტილება, რომ “თბილისის ტაქსის” მფლობელებს ის სამთავრობო ანტიკრიზისული შეღავათი შეეხება, რომელიც ერთჯერადად 300-ლარიან დახმარებას ითვალისწინებს. ეს ეხება ყველა იმ ტაქსის მძღოლს, რომელსაც გააჩნია ლიცენზია, არის ლიცენზირებული და ასევე მიკროავტობუსების მძღოლები, ისინი ისარგებლებენ ამ პროექტით.
ამ დახმარების მისაღებად საჭირო იქნება გარკვეული, მინიმალური პროცედურების გავლა და შესაბამისი სამსახურებისთვის მონაცემების მიწოდება. ჯანდაცვის სამინისტროში შეიქმნა სპეციალური კომისია და ის პირები, ვინც კორონავირუსის პანდემიის პირობებში დაკარგეს შემოსავალი, ცენტრალური ხელისუფლებისგან ერთჯერად დახმარებას მიიღებენ. ამის შესახებ მათ დეტალურად მიეწოდებათ ინფორმაცია,”- განაცხადა კახა კალაძემ.
