“მე ამ წუთში ვარ კლინიკის ხელმძღვანელი, მაგრამ ვარ მოწოდებით ექიმი და არასდროს არ ვარღვევ ეთიკას, შესაბამისად არანაირი უფლება არ გამაჩნია პაციენტის იდენტიფიკაციაზე ვისაუბრო” – განმარტავს პირველი საუნივერსიტეტო კლინიკის დირექტორი კლინიკის მედპერსონალის დაინფიცირების თაობაზე გავრცელებული ინფორმაციის საპასუხოდ. ლევან რატიანის თქმით, პაციენტს აქვს უფლება ნებისმიერ ტელევიზიას მიაწოდოს ინფორმაცია და იმავეს პაციენტებთან მიმართებაში ნუ მოსთხოვენ მას:
“მინდა გითხრათ, რომ მე ამ წუთში გახლავართ კლინიკის ხელმძღვანელი, მაგრამ ვარ მოწოდებით ექიმი და არასდროს არ ვარღვევ ეთიკას. ეთიკა ეს არის პაციენტსა და ექიმს შორის ურთიერთობა. აქედან გამომდინარე ნებისმიერ პაციენტს, რომელიც არის ინფიცირებული თუ არაინფიცირებული, მას უფლება აქვს ილაპარაკოს მისი დაავადების შესახებ, მაგრამ მე როგორც ექიმს არანაირი უფლება არ გამაჩნია პაციენტის იდენტიფიკაციაზე მის კონფიდენციალობაზე ვისაუბრო.
აღნიშნულიდან გამომდინარე თუ პაციენტებმა გადაწყვიტეს კონტაქტზე გამოსვლა ნებისმიერ ტელევიზიასთან, ნებისმიერ საინფორმაციოსთან ეს მათი უფლებაა, მაგრამ მე ნუ მომთხოვთ პასუხს იმასთან დაკავშირებით, ვინ არის ინფიცირებული, მათი იდენტიფიცირება მოვახდინო.
რაც შეეხება პირად აღჭურვილობას. ჩემი მედპერსონალი, განსაკუთრებით ჩემ კლინიკაში, ემორჩილება მსოფლიო ჯანდაცვის ორგანიზაციის მიერ გაცემულ რეკომენდაციას იმის შესახებ, როგორ უნდა იყოს აღჭურვილი და რა ეტაპზე რა უნდა განვახორციელოთ, მაგრამ ერთიც გავითვალისწინოთ, – ვირუსს რომელსაც ამ და სხვა ნებისმიერ კლინიკაში ებრძვიან ამ ვირუსს ექიმები, მედპერსონალებიდან არცერთი არ ვართ დაზღვეული, არც მე მათ შორის, რომ არ დავინფიცირდებით, რომ არ დავმძიმდებით, რომ არ გადავალთ რეანიმაციაში და რომ არ დამთავრდება ჩვენი სიცოცხლე ბიოლოგიური სიკვდილით. ამ პასუხისმგებლობას ვიღებთ, რომ ვემსახუროთ ქვეყანას!
ძალიან გთხოვთ გვაცალეთ მუშაობა, ჩვენ თქვენ გემსახურებით!” – განაცხადა ლევან რატიანმა.
