პრემიერ-მინისტრის ხელმძღვანელობით უწყებათაშორისი საკოორდინაციო საბჭოს სხდომა გაიმართა. თუ კონკრეტულად რა საკითხები იყო განხილული საბჭოზე ეს ინფორმაცია პრემიერ-მინისტრის მრჩეველმა, პრესსპიკერმა ირაკლი ჩიქოვანმა მიაწოდა ჟურნალისტებს. ანტიკრიზისული გეგმის მიხედვით დღეიდან იწყება შეზღუდვების მოხსნისა და ეკონომიკური გახსნის პირველი ეტაპი. რაც გულისხმობს მსუბუქი ავტოსატრანსპორტო საშუალებებით თავისუფალ გადაადგილებას და ტაქსების ოპერირებას. ასევე დღეს და ხვალ – 27 და 28 აპრილს, საგამონაკლისო წესით, დასაშვებია ამ ქალაქებში შესვლა და ამ ქალაქებიდან გასვლა, მხოლოდ ფაქტობრივ საცხოვრებელ მისამართზე დაბრუნების მიზნით. როგორც ირაკლი ჩიქოვანმა განაცხადა სხდომაზე ხაზგასმით აღინიშნა, რომ ეპიდემიოლოგიური ვითარების ანალიზის საფუძველზე, შესაძლოა, ხელახლა დაწესდეს მოხსნილი შეზღუდვები:
„როგორც მოგეხსენებათ, დღეიდან ქვეყანაში ამოქმედდა დაწესებული შეზღუდვების შემსუბუქებისა და ასევე ეკონომიკური გახსნის გეგმა, რაც გულისხმობს იმას, რომ ჩვენს ქვეყანაში დღესდღეობით შესაძლებელია მსუბუქი ავტომობილებით გადაადგილება და ასევე, შესაძლებელია ტაქსების ოპერირება, ასევე შესაძლებელია ონლაინვაჭრობა, როგორც საბითუმო, ასევე საცალო და ამოქმედდება აგრარული ბაზრები.
აქ მინდა, ხაზი გავუსვა იმ გარემოებას, რომ ყველა ეს სერვისი და ყველა ამ შეზღუდვის მოხსნა განხორციელდება ჯანდაცვის სამინისტროს სპეციალური პროტოკოლისა და შესაბამისი სამინისტროების სპეციალური რეგულაციების მკაცრი დაცვით.
ძალიან მნიშვნელოვანია, რომ ჩვენ ყველამ დავიცვათ ის მოთხოვნები, რომელიც აუცილებელია, მიუხედავად იმისა, რომ ქვეყანაში იხსნება ეკონომიკური შესაძლებლობები და გარკვეულ წილად იხსნება შეზღუდვები ჩვენ აუცილებლად დავიცვათ ყველა მოთხოვნა, რომელიც გააჩნია ჯანდაცვის სამინისტროს და შესაბამის უწყებებს.
მინდა, ხაზი გავუსვა იმას, რომ ჩვენმა მოქალაქეებმა ამ შეზღუდვების შემსუბუქება არ უნდა აღიქვან როგორც კოვიდ19-თან ბრძოლაში გამარჯვება,“ – განაცხადა ირაკლი ჩიქოვანმა.
ავტორი
თამთა ასლანიშვილი
