“სტრატეგია აღმაშენებლის” ერთ-ერთი ლიდერი, ნანა ტოხვაძე მზია ამაღლობელისა და ნინო დათაშვილის პატიმრობაში ყოფნას პოლიტიკური შეფასებებით ეხმაურება:
“დღეს ჩვენ გაუგონარი პოლიტიკური რეპრესიებისა და დევნის მომსწრე ვართ.
ვხედავთ, რომ რეჟიმი განსაკუთრებული სისასტიკით უსწორდება ქალებს. ტოტალიტარიზს სძულს თავისუფალი ადამიანები, როგორც პირდაპირი საფრთხე და ამიტომაც ცდილობს მათ დამორჩილებას. მაგრამ ღირსების, სიმტკიცისა და ადამიანობის წინაშე — როგორებიც არიან მზია ამაღლობელი და ნინო დათაშვილი — რეჟიმი მარცხდება.
რეჟიმი მარცხდება არა მხოლოდ საერთაშორისო საზოგადოების თვალში, არამედ საკუთარი მხარდამჭერების თვალშიც. ბუნებაში არ არსებობს სამართლებრივი ან მორალური პრინციპები, რომლითაც მზიას პატიმრობაში დატოვებას ან დატყვევებული მასწავლებლის ფსიქიატრიულ დაწესებულებაში იძულებით გადაყვანას ახსნიან.
უკვე 250 დღეა, საქართველო ფეხზე დგას. და ყველა პროცესზე ფეხზე დგას მზია ამაღლობელი — როგორც შეურიგებლობის, სიმტკიცისა და ქართველი ქალის ღირსების სიმბოლო. მზიას უკან დგას ხალხი.
ლაჩარი დგებუაძის უკან კი ძირგამომპალი რეჟიმი. ნინო დათაშვილის უკან დგანან პროფესიონალები. ხოლო მისი გამოგონილი დიაგნოზის უკან — საბჭოთა ტერორის აჩრდილი, რომლის განხორციელებასაც გეგმავს რეჟიმი დავით მაღრაძის ხელით.
ჩვენ არ დავუშვებთ, რომ სიჩუმემ და შიშმა კიდევ ერთხელ გაიმარჯვოს და დაგვაბრუნოს შემზარავ წარსულში. ეს ბრძოლა მხოლოდ ორი ქალის კი არა, მთელი ქვეყნის ღირსებისთვის ბრძოლაა.
მოვუწოდებ თითოეულ მოქალაქეს, ხმა ამოვიღოთ ახლა, რადგან თითოეული დღე გადამწყვეტია.
დღეს, 8 საათზე ყველას გელოდებით თავისუფლების მოედანზე ნინო დათაშვილის მხარდასაჭერად. თავისუფლება რეჟიმის ტყვეებს!” – აცხადებს ნანა ტოხვაძე.
ინფორმაციას “სტრატეგია აღმაშენებლის” მედიასთან და საზოგადოებასთან ურთიერთობის სამსახური ავრცელებს
