პარტია “ახალი საქართველოს” თავმჯდომარე ვიდეომიმართვას ავრცელებს. მიმართვის ადრესატი ამ შემთხვევაში არა ხელისუფლება, არამედ საპატრიარქო და მრევლია. როგორც ოპოზიციონერი ლიდერი აცხადებს, მისთვის ადვილი არ არის საზოგადოებას/მრევლს მოუწოდოს სახლში დარჩენისაკენ და ეკლესიაში წასვლისაგან თავშეკავებას ურჩევს. მისი განმარტებით, ბევრი ვერ გაიგებს მის ამ მოწოდებას და არაქრისტიანულ ქცევად ჩაუთვლიან, თუმცა პოლიტიკოსის თქმით დუმილი ახლა დანაშაულია, რადგან ადამიანების სიცოცხლესისა და ჯანმრთელობის გარდაუვალ საფრთხეს ხედავს. მისი განმარტებით ხელისუფლება მალავს და აყალბებს ინფიცირებულთა მონაცემებს, რათა შემდეგ პასუხისმგებლობა საპატრიარქოსა და მრევლის დაუდევრობას დაბრალდეს:
„დღეს დიდი ხუთშაბათია, საიდუმლო სერობის ანუ პირველი საღვთო ლიტურღიის დღე. სწორედ ამ დღეს მინდა მივმართო არა ხელისუფლებას, რომელმაც პილატეს მზაკვრული გზა უკვე აირჩია, არამედ საპატრიარქოს.
მეგობრებო, ქვეყანაში დაწყებულია საშიში ვირუსის ფარული, მრავალჯერადი, უკონტროლო გავრცელება, რადგან არ გვაქვს მასობრივი დიაგნოსტიკა-ტესტირება. ჩვენს ირგვლივ უამრავი ადამიანია, რომლებმაც არ იციან, რომ ინფიცირებულები არიან, შესაბამისად, სავარაუდო ინფიცირებულთა რიცხვი ბევრად მეტია, ვიდრე არსებული სტატისტიკა.
პირდაპირ შემიძლია გითხრათ, რომ ხელისუფლება სავარაუდოდ მალავს და აყალბებს მონაცემებს, რასაც აღდგომის შემდეგ აუცილებლად მოჰყვება ინფიცირებულთა მკვეთრი მატება და ამას ხელისუფლება საპატრიარქოსა და მრევლის დაუდევრობას დააბრალებს!
მოგმართავთ თხოვნით, გავუფრთხილდეთ ერთმანეთს, ნუ გამოვცდით უფალს და განსაცდელში ნუ შევიყვანთ ჩვენს მოქალაქეებს. მოვუწოდოთ მრევლს სიფრთხილისკენ და დროებით, ერთჯერადად გამოვაცხადოთ წირვა მრევლის გარეშე. ხოლო უპასუხისმგებლო ხელისუფლება ერთად ვაიძულოთ მკაცრად გააკონტროლოს ეპიდუსაფრთხოებასთან დაკავშირებული სამოქალაქო წესრიგი.
საფრთხე რეალურია და ერთმანეთის გადარჩენისთვის სხვა არჩევანი დღეს არც ჩვენ და არც ქვეყანას სამწუხაროდ არ აქვს.
დარჩით სახლში, უფალი ყველგანაა!
დღეს, ჩემთვის როგორც პოლიტიკოსისთვის ადვილი არ არის გითხრათ დავრჩეთ სახლში და დროებით თავი შევიკავოთ ეკლესიაში მისვლისაგან! რადგან, ვიცი რომ ბევრი ვერ გაიგებს ჩემს ამ მოწოდებას და არაქრისტიანულ ქცევად ჩამითვლის მაგრამ ახლა, როცა თქვენი და ჩვენი სიცოცხლისა და ჯანმრთელობის გარდაუვალ საფრთხეს ვხედავ, ვთვლი, რომ ჩემი დუმილი დანაშაულია.
მჯერა, ქრისტესთვის ერთი სიცოცხლე ბევრად უფრო ღირებულია, ვიდრე ყველა ტაძარი თუ ნებისმიერი მატერიალური სხვა სიკეთე ერთად აღებული. ქრისტეს აღდგომა უპირველესად სიცოცხლის სიკვდილზე, სიყვარულის კერპებზე გამარჯვების ზეიმია და არა პირიქით.
ქრისტე აღსდგა!
ყველა ის ექიმი, პოლიციელი, სამხედრო თუ უბრალო მოქალაქე, ვინც საკუთარ სიცოცხლეს სწირავს სხვისი სიცოცხლისა და ჯანმრთელობისთვის გაცხადებული ღმერთია ჩვენთვის! გავუფრთხილდეთ ერთმანეთს! უფალი ყველგანაა! ქრისტე აღსდგა!” – განაცხადა გიორგი ვაშაძემ.
ავტორი
თამთა ასლანიშვილი
