“ვიზა” და “მასტერქარდის” საბანკო ბარათებთან დაკავშირებით, პარლამენტის კომიტეტის სხდომაზე დაწყებულმა გარჩევებმა მოსახლეობის ფართო მასებში გადაინაცვლა და საკმაოდ საფუძვლიანი შიშები გააჩინა, რამეთუ აღნიშნულ საბანკო ბარათებზე წვდომისა და გამოყენების მსურველი საქართველოში საკმაოდ ბევრია და ეს პირდაპირ უკავშირდება საერთაშორისო გადარიცხვებს/ტრანზაქციებს. მართალია ეროვნულმა ბანკმა განაცხადა, რომ ხსენებულ საბანკო ბარათებთან დაკავშირებით არანაირი პრობლემები არაა მოსალოდნელი, მაინც საყურადღებოა პარლამენტის ყოფილი დეპუტატის, საქართველოს ეროვნული ბანკის ყოფილი პრეზიდენტის, ეკონომისტ რომან გოცირიძის მოსაზრებები:
“არა მგონია, რომ ეროვნული ბანკი საქნქციებისთვის ემზადება და ვიზისა და მასტერქარდის ჩასანაცლებლად თადარიგს იჭერდეს. თუ ქვეყანაში ვიზამ და მატერქარდმა მუშაობა შეაჩერა, ეს იმას ნიშნავს, რომ საქართველოს ისეთი სანქციები დაუწესდა, რომელიც ფინანსურ სისტემას გაანადგურებს. ბანკები შეწყვეტენ ანგარიშსწორებას და ეკონომიკა გაჩერდება.
მსგავსი ეჭვები აღძრა პარლამენტში საკომეტეტო მოსმენაზე დასმულმა ბრიყვულმა შეკითხვამ, რომ თურმე საანგარისწორებო ამ საერთაშორისო კომპანიებს ფული გააქვთ საქართველოდან. არა მხოლოდ საქართველოში, არამედ მთელ მსოფლიოში ბანკები (საბოლოო ჯამში კლიენტები) ფულს უხდიან მათ მომსახურებისათვის. არავინ აძალებს მათ ამ ბარათების გამოყენებას და ბანკებს რომ შეეძლოთ მსგავსი ოპერაციების უფრო იაფად განხორციელება, მათ ამას ვერავინ დაასწრებდა.
დროთა განმავლობაში, მართლაც შეიძლება საბანკო ბარათებით ანგარისწორებას კონკურენტი გამოუჩნდეს (კრიპტოფული, ციფრული ვალუტა, სადაც ბარათის ნაცვლად ტელეფონები იქნება გამოყენებული და ა. შ. ), მაგრამ ეს ძალიან შორეული პერსპექტივაა.
სანქციებზეც რომ ფიქრობდნენ “ოცნებაში” და რაღაც ირანულ-რუსულ სქემებზე რომ მსჯელობდნენ, არც ეს უნდა გაგვიკვირდეს, მაგრამ ასეთი რეალობის წინაშე თუ აღმოვჩნდით, ესენი გაქცევას ვერ მოასწრებენ“, – წერს რომან გოცირიძე ფეისბუქის პირად გვერდზე.
