,,ერთიანობა – ნაციონალური მოძრაობის” ერთ-ერთი ლიდერი, გიგი წერეთელი სააგენტო ,,პარალელთან” ინტერვიუში საუბრობს 26 ოქტომბრის არჩევნების განსაკუთრებულ მნიშვნელობაზე და ამ მხრივ საერთაშორისო დამკვირვებლების საქართველოში დიდი რაოდენობით მობილიზებასთან დაკავშირებით:
,,საერთაშორისო დამკვირვებლების ძალიან დიდი რაოდენობაა მობილიზებული საქართველოში. უმეტესწილად ეს გამოცდილი ხალხია, როგორც ეუთო-ოდირის მხრიდან, ასევე მოკლევადიანი – პრაქტიკულად ყველა დიდი საპარლამენტო ასამბლეის დელეგაციაა ჩამოსული, როგორც ეუთოს ასევე ევროპარლამენტის, ნატოს, ევროპის საბჭოს დელეგაციები და ამას დამატებული, კიდევ ბევრი სხვადასხვა საერთაშორისო ორგანიზაციის წარმომადგენელი.
ამას აქვს დიდი მნიშვნელობა იმიტომ, რომ არჩევნების საერთაშორისო შეფასება არის სწორედ ის ინსტრუმენტი, რითაც შემდგომში უკვე ისაზღვრება ქვეყნის მიმართ პოლიტიკა, რაც მთავარია ის, თუ როგორ გაიარა ამ შემთხვევაში საქართველომ ეს ტესტი და პირველ რიგში საქართველოს ხელისუფლებამ.
იმიტომ, რომ ჩვენ კარგად ვიცით რამდენად დიდი ინტერესია ამ საკითხის მიმართ, ჩვენ ვნახეთ ბოლო პერიოდის ყველა მოწოდება, რეზოლუცია, კრიტიკა, გაფრთხილება, რომ თუკი ეს არჩევნები არ იქნება საერთაშორისო სტანდარტის შესაბამისი და მანიპულაციები იქნება ხელისუფლების მხრიდან, გადამეტებული გამოყენება ადმინისტრაციული რესურსების თუ, ასე ვთქვათ, რაღაც ძალისმიერი მეთოდების – ეს, რა თქმა უნდა, იქნება უმძიმესი დარტყმა ჩვენი სახელმწიფოსთვის, მისი ევროპული მომავლისთვის, ისედაც მთელი ეს პროცესი, რაც ევრო-ატლანტიკურ ინტეგრაციას ეხება არის შეჩერებული დღეს და ყველა ელოდება არჩევნების შედეგებს.
შესაბამისად, საერთაშორისო დამკვირვებლებზეა დამოკიდებული ამ შეფასების მიწოდება და ამ შეფასების გაცნობა მსოფლიოსთვის და მათ შორის ჩვენი მოსახლეობისთვის, საზოგადოებისთვის. ყველამ კარგად ვიცით, კამპანიისგან გამომდინარე, იმ შეხვედრებიდან გამომდინარე, რომ ხალხის განწყობა არის ამ ოლიგარქიული ხელისუფლების შეცვლა/ჩამოშორება ამ ქვეყნის მართვის სადავეებიდან, კოალიციური მმართველობის შექმნა და შემდეგ ძალიან სწრაფად ქვეყნის ევროპული ინტეგრაცია.
ამ ყველაფრის კომპეტენციაც, გამოცდილებაც და უნარიც კოალიციურ მთავრობას აუცილებლად ექნება იმისათვის, რომ დაჩქარდეს ყველა ეს პროცესი, რათა რაც შეიძლება მეტმა ადამიანმა იგრძნოს კეთილდღეობა, დაცულობა, უსაფრთხოება, მშვიდობა, რომელიც არის ევროპაში.
კითხვები და ინტერესი ბუნებრივია იყო და არის კამპანიის მიმდინარეობაზე, იმ მკვეთრ პოლარიზაციაზე, ძალიან მტრულ და ნეგატიურ კამპანიაზე, რომელსაც აწარმოებს ხელისუფლება, მუქარები არჩევნების შემდეგ პოლიტიკური პარტიების გასამართლებაზე, აკრძალვაზე, არასამთავრობო სექტორის დაშინება რუსული კანონით და სამწუხარო ფაქტი – ბოლო დღეების განმავლობაში რეიდები და შეტევა განხორციელდა ცნობილი ამერიკული ორგანიზაციის წარმომადგენლებზე, ასევე კონკრენტულ პოლიტიკურ პარტიასთან აფილირებული სახეების სახლების ჩხრეკა – ეს ყველაფერი არის გამოვლინება იმ ძალიან მავნებლური ქმედებების, რაც მთლიანობაში სურათს ამძიმებს.
არავითარი ლოგიკა არ არის იმაში, რატომ უნდა აკეთებდეს ამ ყოველივეს ხელისუფლება, რომელიც არწმუნებს საზოგადოებას, რომ მას შეუძლია გაიმარჯვოს ამ არჩევნებში.
დარწმუნებული ვარ, რომ ჩვენი ამომრჩევლები ჩამოაშორებენ ,,ქართულ ოცნებას’’ ხელისუფლებას და ხმას მიცემენ საქართველოს ერთიანობას, კეთილდღეობას და მის ევროპულ მომავალს’’,- განაცხადა გიგი წერეთელმა.
ავტორი
მარიამ ხაჩირაშვილი
