ივანე მერაბიშვილის საპატიმროდან გამოსვლას და მის პირველ საჯარო განცხადებებს იუსტიციის მინისტრი ეხმიანება. თეა წულუკიანს მიაჩნია, რომ მას შემდეგ, რაც მერაბიშვილი გაერკვევა სიტუაციაში, დაინახავს რომ ნაციონალური მოძრაობა სულაც აღარ არის ერთიანი – ეს არის დაქსაქსული ძალა და მას გაუჭირდება პოლიტიკურ პროცესებში ეფექტურად ჩართვა:
“როდესაც პატიმარი რამდენიმე წუთის გამოსულია საპატიმროდან, რა თქმა უნდა, მას აქვს რეალობის დეფორმირებული განცდა, ამიტომ მე არა მგონია მის განცხადებაზე რაიმე სერიოზული კომენტარი უნდა გავაკეთო.
ბატონ ვანო მერაბიშვილს მოუწევს დროსთან ერთად იმის შეფასება, თუ რა დატოვა და რა დახვდა. მაგალითად, ნახავს, რომ “ნაციონალური მოძრაობა” სულაც აღარ არის ერთიანი – ეს არის დაქსაქსული ძალა და შემდეგ ამ დაქსაქსული ელემენტების დეგრადირების ხარისხის შეფასება მოუწევს. მოუწევს გაიაზროს, რომ ის, რეალურად, ქცეულია მისი ყოფილი პოლიტიკური ძალის დანაყოფებისთვის პოლიტიკურ და პიარულ ცხელ კარტოფილად, რომელიც არავის, ალბათ, არ უნდა და დაიწყებენ მისით პინგ-პონგის თამაშს, იმიტომ რომ ის, რეალურად, არის პრობლემა, როგორც თავად ეს ტერმინი გამოიყენა ერთერთ ვიდეოში, – არის “მეტრუპე”. შესაბამისად, არ შეიძლება, რომ “მეტრუპე” ვინმეს უნდოდეს თავისთან. თუმცა, მოჩვენებითად, ალბათ ეტყვიან, რომ გვიხარია შენი ჩვენთან ყოფნა.
ამიტომ, მას ძალიან ბევრი სამუშაო აქვს. ვაცალოთ, ეს სამუშაო ჩაატაროს, შეაფასოს, თვითონვე შეიქმნას აზრი იმასთან დაკავშირებით, თუ რისი თავი აქვს მას და მის პოლიტიკურ ძალას და შემდეგ ვილაპარაკოთ, ვინ ვის დაამხობს”, – განაცხადა თეა წულუკიანმა.
