ეროვნული ნაკრების ფეისბუქის ოფიციალურ გვერდზე, ევროპის ჩემპიონატის მერდველფინალის, ესპანეთთან მატჩის წინ ჩატარებულ პრესკონფერენციაზე საქართველოს ნაკრების მწვრთნელის, ვილი სანიოლისა და საქართველოს ნაკრების მეკარის, გიორგი მამარდაშვილის მიერ გაკეთებული კომენტარები გამოქვეყნდა:
,,მხოლოდ დაცვაში თამაშს არ ვაპირებთ, გვინდა რომ პორტუგალიის მსგავსად ესპანეთსაც და მთელს ევროპას ვაჩვენოთ რომ მხოლოდ დაცვაში არ ვართ ძლიერები, არამედ ბურთთან თამაშშიც. ამ ევროპის ჩემპიონატზე ჩემთვის საქართველო უკვე გამარჯვებულია და მოუთმენლად ველით კიდევ ერთ მატჩს ამ ტურნირზე და საქართველოს ჰიმნის კიდევ ერთხელ აჟღერებას“, – განაცხადა ვილი სანიოლმა.
,,რთული მატჩი იქნება, სოლიდური მეტოქე გვყავს, ვფიქრობ გახსნილ და შემტევ ფეხბურთს ითამაშებენ, დაცვაში უშეცდომოდ და სრული კონცენტრაციით უნდა ვითამაშოთ და შეტევაში ჩვენს შანსებს დაველოდოთ“, – განაცხადა გიორგი მამარდაშვილმა.
ავტორი
ნინი ხიჯაკაძე
