საქართველოს პარლამენტთან ოპოზიციისა და სამოქალაქო აქტივისტების აქცია გაიმართა. პროპორციული საარჩევნო სისტემის მოთხოვნით, აქციის მონაწილეებმა ე.წ. „სირცხვილის დერეფანი“ მოაწყვეს. “ახალი საქართველოს” თავმჯდომარე, გიორგი ვაშაძე აცხადებს, რომ უმრავლესობის დეპუტატებს ჩუმად და შეპარვით მოუწევთ პარლამენტში შესვლა:
„ისინი იპარებიან, შეიპარნენ, ასე გაპარვით და ასე ჩუმად მოუწევთ ყოველთვის სიარული. მათ ეშინიათ ხალხთან საუბრის. ოქტომბერში დავამთავრებთ ერთხელ და სამუდამოდ, მაგრამ მანამდე მნიშვნელოვანი პროცესია და რაც უფრო დროულად და ადეკვატურ პასუხს გასცემენ ამ ყველაფერს, მით უფრო მეტად შეინარჩუნებენ სახეს, დააგვიანებენ? გაცილებით უარესი იქნება შედეგები მათთვის“, – განაცხადა ვაშაძემ.
ქართული ოცნების ლიდერმა, გია ვოლსკიმ პარლამენტში ბიუროს სხდომის გახსნაზე განაცხადა, რომ აქციის გამო “სამწუხაროდ გარეთ ცოტა ხმაურია”, თუმცა ეს მათ მუშაობაში ხელს ვერ შეუშლით. სხდომის მიმდინარეობისას დარბაზში ისმოდა პარლამენტთან შეკრებილი აქციის მონაწილეების შეძახილების ხმა:
“ბიუროს სხდომას გახსნილად ვაცხადებ, სამწუხაროდ გარეთ ცოტა ხმაურია, მაგრამ ეს არ შეგვიშლის მუშაობაში, ვინაიდან საკითხები, რომლებიც განხილვის დღის წესრიგშია დღეს და შემდგომ სხდომებზეც არის საგანგებო მნიშვნელობის ჩვენი ქვეყნისთვის, აქედან გამომდინარე, მე ვფიქრობ, რომ დილის შეკრებაც, რომელიც ჩვენ ჩავატარეთ არანაირად არ უკავშირდება იმ თემას, რომ უმრავლესობას არ აქვს დღის წესრიგზე გარკვეული პოზიციები და თითქოს მთელი ჩვენი ენერგია და აქტივობები არის დაკავშირებული, ან არის შესაბამისობაში მოსაყვანი იმ აქტივობასთან, რასაც ზოგიერთი ბოიკოტის რეჟიმში მყოფი დეპუტატი გარეთ ატარებს“, — აღნიშნა გია ვოლსკიმ.
შეგახსნებეთ, რომ საკანონმდებლო ორგანოში უმრავლესობის სხდომა სამოქალაქო აქტივისტებისა და ოპოზიიცის საარჩევნო სისტემის შეცვლის მოთხოვნით გამართული აქციის ფონზე მიმდინარეობდა.
ავტორი
ბეჟან ბერულავა
