ყოფილი პრემიერ-მინისტრი, პარტია ,,საქართველოსთვის” თავმჯდომარე, გიორგი გახარია ერთ-ერთი შეხვედრის დროს საუბრობს ახალგაზრდებთან დაკავშირებით, სადაც აღნიშნავს, რომ თუ მომავალი თაობა საქართველოში განვითარების პერსპექტივას ვერ დაინახავს, ისინი საკუთარ ქვეყანას დატოვებენ:
,,ქვეყაში, სადაც არის კორუფცია და ნეპოტიზმი, იმ ქვეყანას მომავალი არ აქვს. ქვეყანას, სადაც ახალგაზრდები ვერ ხედავენ, რომ არის თანაბარი პირობები და არ არსებობენ პრივილეგირებული კასტები, ეს ახალგაზრდები – საუკეთესოები, ქვეყნას დატოვებენ, საზღვარგარეთ წავლენ და აქ უვარგისები დარჩებიან. ეს უვარგისები გახდებიან მერე პოლიტიკოსები, ეს უვარგისები იქნებიან ყველგან – ხელოვნებაში, განათლებაში, ბიზნესში, ყველგან ესენი იქნებიან…
ქვეყნის საერთო შედეგი იქნება კატასტროფული.
საქართველოსნაირ ქვეყანაში ნებისმიერი ფორმის კორუფცია უბრალოდ ამორალური, არაკანონიერი ან დანაშაული კი არ არის, ქვეყნის ღალატია. თუ საქართველოსნაირ ქვეყანაში ადამიანებმა არ იციან, რომ მათ თანაბარი უფლებები აქვთ, ისინი თანაბარ პირობებში იბადებიან, ცხოვრობენ, თანაბარ პირობებში აქვთ კონკურენცია ერთმანეთთან, მაშინ ის ადამიანები ამ ქვეყნას დატოვებენ.
ეს არ არის XIX-XX საუკუნე, მობილურობა არის ძალიან მაღალი. ჩავა აგერ, ქუთაისში, 100 ლარად იყიდის ბილეთს, სადღაც გაურკვევლობაში წავა. იმიტომ, რომ ის გაურკვევლობა ურჩევნია იმ გარემოს, როდესაც აქ იცის, რომ ვიღაც თანამდებობის პირის შვილი, ნათესავი, მეზობელი, პეტრე, პავლე, ნებისმიერ შეჯიბრში უბრალოდ აჯობებს. იმიტომ კი არა, რომ უფრო ჭკვიანია ან უკეთესია, ან უფრო ორგანიზებულია, შრომისმოყვარეა. უბრალოდ იმიტომ, რომ ვიღაცის ნათესავია, რა. ეს უსამართლობის განცდა ანგრევს ქვეყნის მომავალს“, – განაცხადა გიორგი გახარიამ.
ავტორი
ნინი ხიჯაკაძე
