მპგ ,,სტრატეგია აღმაშენებელი“-ს ეთნიკურ-რელიგიური მიმართულების ხელმძღვანელმა – შორენა ლობჟანიძემ პარლამენტს საკანონმდებლო წინადადებით მიმართა, რომლითაც ითხოვს საქართველოს შრომის კოდექსში დაემატოს საკანონმდებლო დათქმა, რაც არამართლმადიდებელ მოსახლეობას, მათი მთავარი რელიგიური დღესასწაულის დროს, სურვილის შემთხვევაში, გარანტირებული დასვენების შესაძლებლობას მისცემს და დამსაქმებლებს დაეკისრება გონივრული მისადაგების ვალდებულება არამართლმადიდებელი მოსახლეობის მიმართ:
,,ევროპის საბჭოს ადამიანის უფლებათა კომისრის 2021 წლის ანგარიშში, საქართველოში არადომინანტური მოსახლეობის მდგომარეობა ხარვეზიანად შეფასდა, რაც სხვა მნიშვნელოვან საკითხებთან ერთად მოიცავდა არამართლმადიდებელი მოქალაქეებისთვისთვის მათი რელიგიური დღესასწაულის დროს, სურვილის შემთხვევაში, გარანტირებული დასვენების შესაძლებლობას მიუცემლობას.
2023 წელს კვლავ გადაუჭრელ საკითხად რჩება სხვადასხვა სექტორში დასაქმებული რელიგიური უმცირესობის წარმომადგენლებისთვის საკუთარი რელიგიური დღესასწაულებითა და უქმე დღეებით სარგებლობა.
სახელმწიფოს პირდაპირი ვალდებულებაა, საერთაშორისო კანონმდებლობაზე დაყრდნობით, იზრუნოს ამ მიმართულებით დისკრიმინაციის აღმოფხვრაზე.
სწორედ აქედან გამომდინარე, მივმართეთ საქართველოს პარლამენტს და იმედს ვიტოვებთ აღნიშნული საკითხი დადებით ჭრილში იქნება განხილული და გადაწყვეტილი“, – განაცხადა შორენა ლობჟანიძემ.
