“რომ არა ხელისუფლების ის ქმედებები, ანტიდასავლური რიტორიკა, შეუსრულებელი რეკომენდაციები, დღეს ჩვენ უნდა გვესაუბრა ევროკავშირთან მოლაპარაკებების დაწყებაზე” – ნინო ლომჯარია

ყოფილი სახალხო დამცველი, ნინო ლომჯარია ჟურნალისტებთან შეფასებას აკეთებს ევროკომისიის მოსალოდნელ გადაწყვეტილებაზე საქართველოსთვის კანდიდატის სტატუსის მინიჭების საკითხთან დაკავშირებით:

,,ბოლოს მიღებული ინფორმაციებით, მოლოდინი არის პოზიტიური. მე ვფიქრობ, ეს დღე რომ მოვიდა და ჩვენ გვაქვს პერსპექტივა იმის, რომ დეკემბერში სტატუსი მივიღოთ, შესაძლებელია, რომ დღეს იყოს პოზიტიური რეკომენდაცია ამასთან დაკავშირებით, ეს არის ნამდვილად საქართველოში აქტიური სამოქალაქო საზოგადოების და მოქალაქეების დამსახურება.

თუმცა, რა თქმა უნდა, ეს არ არის საბოლოო გამარჯვება. უბრალოდ, ეს არის დასაწყისი და შესაძლებლობა, რომ ჩვენ დეკემბერში სტატუსი მივიღოთ. სტატუსის მიღების შემდგომ იწყება მთავარი – ევროკავშირთან მოლაპარაკებების გახსნა.

კიდევ ერთი – რომ არა ხელისუფლების ის ქმედებები, ანტიდასავლური რიტორიკა, შეუსრულებელი რეკომენდაციები, დღეს, ჩვენ არა თუ სტატუსის მიღების შესაძლებლობაზე ვისაუბრებდით, არამედ დღეს ჩვენ უკვე უნდა გვესაუბრა რეალურად ევროკავშირთან მოლაპარაკებების დაწყებაზე, რაზეც მოლდოვა და უკრაინა საუბრობს“, – განაცხადა ნინო ლომჯარიამ.

ავტორი
ნინი ხიჯაკაძე