“ოპოზიციას არ აქვს რეალური დღის წესრიგი – ისინი ცდილობენ, რომ ემოციებზე იმუშაონ” – შალვა პაპუაშვილი

პარლამენტის თავმჯდომარე, შალვა პაპუაშვილი ჟურნალისტებთან განცხადებას აკეთებს გავრცელებულ ვარაუდზე, ევროკავშირის მხრიდან კანდიდატის სტატუსის მიღებისას წინაპირობად შესაძლო მოთხოვნაზე საქართველოს მიერ რუსეთისთვის სანქციების დაწესებასა და მომავალ წელს სამართლიანი არჩევნების ჩატარებასთან დაკავშირებით:

,,რაც შეეხება სანქციებს – ეს არის აბსოლუტური აბსურდი. ევროკავშირი არ ითხოვს საქართველოსგან რუსეთისთვის სანქციების დაწესებას. თუკი მოითხოვდა, რა თქმა უნდა, ამის პარალელურად ჩვენთვის სამხედრო და ეკონომიკური უსაფრთხოების გარანტიები უნდა მოეცა.

ამ გარანტიების გარეშე არც ევროკავშირი, მათ შორის, არც NATO და არავინ არ ითხოვს საქართველოსგან რუსეთისთვის სანქციის დაწესებას. ყველა ხვდება, რომ რუსეთისთვის ორმხრივი სანქციების დაწესება, ეს ნიშნავს ეკონომიკურ კატასტროფას საქართველოში.

თავისთავად, 2024 წლის არჩევნები იქნება დაკვირვების ობიექტი. ჩვენთვისაც მნიშვნელოვანია, რომ ამ მხრივ იყოს დიდი ჩართულობა, ვინაიდან უკვე, აქედანვე ვხედავთ რისკებს, რომ ეს იქნება არჩევნები, რომლის წინაც იქნება ძალიან დიდი ნიაღვარი დეზინფორმაციის. იმიტომ, ვხედავთ ოპოზიციას არ აქვს რეალური დღის წესრიგი – ისინი ცდილობენ, რომ ემოციებზე იმუშაონ“, – განაცხადა შალვა პაპუაშვილმა.

ავტორი
ნინი ხიჯაკაძე