,,ქართული ოცნების” თავმჯდომარე, ირაკლი კობახიძე ჟურნალისტებთან კომენტარს აკეთებს პრეზიდენტის იმპიჩმენტის პროცედურის საკითხსა და ოპოზიციის დამოკიდებულებაზე სალომე ზურაბიშვილის მიმართ:
,,ცალკე ოპოზიცია ლაპარაკობს იმაზე, რომ ,,ქართული ოცნება” ცდილობს კულუარებში მეტი ხმის მიღწევას, ცალკე სალომე ზურაბიშვილი თავს გვაცოდებს და ამბობს, რომ არ იცის, რამდენი დღე აქვს დარჩენილი… არ ვიცი, ამ ყველაფერს რა დავარქვა. დაველოდოთ, რამდენიმე დღეში იქნება კენჭისყრა. მე დარწმუნებული ვარ, რომ 90 ხმაზე მეტი არ დაჯდება. მე ვარ ამაში დარწმუნებული.
მარტივი სპეკულაციებია, რასაც მათგან ვართ მიჩვეული. უნდათ თქვან, რომ ვცდილობთ, მაგრამ ვერ მოვახერხეთ. მარტივი რაღაც არის. სინამდვილეში, ყველამ ვიცით, რომ თავიდანვე სალომე ზურაბიშვილი რადიკალური ოპოზიციის იმედით არღვევდა საქართველოს კონსტიტუციას. რადიკალურ ოპოზიციას, კოლექტიურ ,,ნაცმოძრაობას” ძალიან სჭირდება სალომე ზურაბიშვილი საარჩევნოდ პრეზიდენტის თანამდებობაზე, მათ შორის, არჩევნების შემდეგაც.
მათ იციან, რომ არჩევნებს წააგებენ. ელოდებიან არჩევნების შემდგომი პერიოდისთვის, როცა კიდევ ერთხელ უნდა დაიწყონ ლაპარაკი იმაზე, რომ არჩვენები გაყალბდა და ა.შ. სჭირდებათ, რა თქმა უნდა, მათი პარტნიორი სალომე ზურაბიშვილის მხარდაჭერა.
აქედან გამომდინარე, კოლექტიური ,,ნაცმოძრაობა” ვერ შეელევა ამ ერთი წლის განმავლობაში მათ ძვირფას პარტნიორს, სალომე ზურაბიშვილს“, – განაცხადა ირაკლი კობახიძემ.
ავტორი
ნინი ხიჯაკაძე
