„სტრატეგია აღმაშენებლის“ პოლიტიკური საბჭოს წევრმა და სოციალური მიმართულების ხელმძღვანელმა, თეონა ჭალიძემ საქართველოს პრემიერ-მინისტრს, ირაკლი ღარიბაშვილს ობოლი ბავშვებისთვის სოციალური პაკეტის ზრდის მოთხოვნით მიმართა და მთავრობის სასახლეში წერილობითი მოთხოვნა ჩააბარა.
როგორც თეონა ჭალიძე აღნიშნავს, მარჩენალდაკარგული ბავშვების ინტერესებისთვის და საკეთილდღეოდ მნიშვნელოვანია სოციალური პაკეტების ზრდა, რაც არათუ პოლიტიკური საკითხი, არამედ კეთილსინდისიერი მთავრობის მოვალეობაა:
“დღეს პრემიერ-მინისტრს მივმართავთ ობოლი ბავშვების, უფრო ზუსტად, მარჩენალდაკარგული ბავშვების ინტერესებიდან გამომდინარე და საკეთილდღეოდ.
ჩვენ, არაერთმა მშობელმა, მათმა მზრუნველმა მოგვმართა იმასთან დაკავშირებით, რომ აქვთ განცდა, მთავრობამ ისინი დიდი ხანია დაივიწყა და მათ მიმართ არანაირი ნაბიჯი აღარ გადადგმულა. კერძოდ, საუბარია სოციალურ პაკეტზე, რომელიც წლებია უკვე 100 ლარია და არ იზრდება იმის გათვალისწინებით, რომ ყველაფერზე ფასები გაიზარდა, ლარის კურსი ვხედავთ რა მდგომარეობაშიცაა და ამ ადამიანებს სჭირდებათ მეტი ზრუნვა.
მნიშვნელოვანია, რომ მოკვლეულ იქნეს, თუ რა სერვისები სჭირდებათ მათ, რა საჭიროებები აქვთ და ადგილობრივმა მუნიციპალიტეტმა კი ამ მიმართულებით იმუშაონ და შესთავაზონ ეს სერვისები. მარჩენალდაკარგულების საკითხი არ არის პოლიტიკური საკითხი, ვფიქრობ, ეს არის უფრო სამართლიანობის საკითხი და თავმოყვარე, კეთილსინდისიერი მთავრობის ინტერესებში უნდა შედიოდეს, რომ ამ ჯგუფზე უფრო მეტად იზრუნოს და სათანადოდ მოხდეს ზრდა ამ სოციალური პაკეტისა“, – განაცხადა თეონა ჭალიძემ.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” საზოგადოებასთან ურთიერთობის სამსახური ავრცელებს
