„ამხელა სტიქია მოხდა ქვეყანაში. სად იყო პრემიერ-მინისტრი? რატომ არ ჩავიდა ადგილზე? რატომ არ დაუძახა ყველა უწყების ხელმძღვანელს? რატომ არ გასცა ბრძანებები?“, – ამ კითხვებით მიმართა პოლიტიკური ჯგუფის – „რეფორმების ჯგუფის“ წევრმა გიორგი ვაშაძემ შინაგან საქმეთა მინისტრს, ვახტანგ გომელაურს, რომელსაც პლენარულ სხდომაზე ინტერპელაციის წესით უსმენენ.
გიორგი ვაშაძის თქმით, პირველ რიგში, პრემიერ-მინისტრის მორალური, ფუნქციური და საკანონმდებლო პასუხისმგებლობა იყო ჩასულიყო შოვში.
„დიახ, ტრაგედია იყო კომპლექსური, სადაც შინაგან საქმეთა სამინისტროსთან ერთად უნდა ჩასულიყო თავდაცვის სამინისტრო, ჯანდაცვის სამინისტრო, რეგიონული განვითარების სამინისტრო. ეს იყო პრემიერ-მინისტრის ვალდებულება“, – განაცხადა გიორგი ვაშაძემ.
მისი თქმით, კრიზისს კომპლექსური მართვა სჭირდება.
„როცა ქვეყანაში კრიზისია, მას სჭირდება კომპლექსური მართვა, რომელშიც პარალელურ რეჟიმში უნდა მუშაობდეს სხვადასხვა უწყება. ჩვენ ვხედავდით, რომ მხოლოდ რეგიონული განვითარების მინისტრი ჩავიდა ადგილზე, სხვა უწყებების მინისტრის მოადგილეები, სხვადასხვა ადამიანები ერთი კონკრეტული ოთახიდან აკეთებდნენ განცხადებებს“, – განაცხადა გიორგი ვაშაძემ.
ინფორმაციას პარლამენტის საზოგადოებასთან ურთიერთობისა და ინფორმაციის დეპარტამენტი ავრცელებს
