პარლამენტის წევრი, პარტია “სტრატეგია აღმაშენებლის” გენერალური მდივანი, პაატა მანჯგალაძე ოპოზიციური პარტიის წარმომადგენლებს მმართველი პარტიის წინააღმდეგ კონკრეტული პოლიტიკური სტრატეგიით ბრძოლას ურჩევს:
“საზოგადოების დაკვეთა არის გამარჯვება და გამარჯვება მიიღწევა კოორდინაციით, ძალებისა და რესურსების გაერთიანებით და არა ოპოზიციის შიგნით გაუთავებელი გარჩევებითა და კინკლაობით.
რასაც ბოლო პერიოდში ვაკვირდები, ოპოზიციის ზოგიერთ წარმომადგენელს კალენდარი აქვს არეული, ნაცვლად იმისა რომ საუბრობდნენ “ქართული ოცნებიდან” მომდინარე საფრთხეებზე, რომ გამალებული რუსიფიკაცია მიდის ქვეყანაში, ქართველები გადიან და მათ ადგილზე რუსები მკვიდრდებიან, ის რომ ნატოსა და ევროკავშირის ქოლგის გარეშე ტოვებენ ქვეყანას, ისევ “ნაციონალური მოძრაობის” ლამის 15 და 20 წლის წინანდელ შეცდომებზე საუბრობენ.
მე არ მესმის რა პოლიტიკური დივიდენტი შეიძლება მოიტანოს ამან. სტრატეგიულადაც არ მესმის ოპოზიციური პარტიის, რომლის ამოცანაც არ არის ხელისუფლების მხარდამჭერების კლების ხარჯზე საკუთარი და საერთო ოპოზიციური მომხრეების რაოდენობის გაზრდა. ამის ნაცვლად ცდილობენ ოპოზიციის დაზიანების ხარჯზე საკუთარი მხარდამჭერების გაზრდას, რაც “ქართული ოცნების” პირდაპირი დღის წესრიგი და თამაშია. ასე აპირებენ ხელისუფლების შეცვლას?
ყველამ უნდა იცოდეს, ხალხი ზუსტად ისე მოგვექცევა როგორც ჩვენ მოვექცევით მათ. ზუსტად იმდენად გაიზიარებენ ჩვენს პოზიციებს, რამდენადაც ჩვენ გავხდებით მათი პრობლემის გამზიარებლები და მომგვარებლები. ეს არის გამარჯვების რეალური ფორმულა და არა დაუსრულებელი ტალახის სროლა და მეორეხარისხოვან საკითხებზე გარჩევები”, – აცხადებს პაატა მანჯგალაძე.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს
