უკრაინის პრეზიდენტი, ვოლოდიმირ ზელენსკი თურქეთის პრეზიდენტ რეჯეფ თაიფ ერდოღანს შეხვდა. როგორც განაცხადეს, შეხვედრაზე განსახილველი საკითხები იყო უკრაინის NATO-ში ინტეგრაციის პროცესი და შავი ზღვის რეგიონში არსებული ვითარება:
უკრაინის პრეზიდენტის თქმით, შავი ზღვა უნდა იყოს უსაფრთხოებისა და თანამშრომლობის სივრცე:
,,რა თქმა უნდა, პრეზიდენტ ერდოღანთან ერთად დეტალურად განვიხილეთ ვითარება შავი ზღვის რეგიონში და მთლიანად ევროპაში. ჩვენ ვიზიარებთ ხედვას, რომ არავის აქვს უფლება შავი ზღვის რეგიონში სახელმწიფოებსა და ერებს დააკისროს ისეთი რამ, რაც არ შეესაბამება ჩვენი სახელმწიფოებისა და ერების ინტერესებს.
შავი ზღვა უნდა იყოს უსაფრთხოებისა და თანამშრომლობის სივრცე და არა ომის, კრიზისის ან ე.წ. გაყინული კონფლიქტის, რომელიც ნებისმიერ დროს შესაძლოა განახლდეს.
შევეხეთ ასევე NATO-ს ფარგლებში ჩვენი თანამშრომლობის ძირითად ასპექტებს, განსაკუთრებით ვილნიუსის სამიტის მზადებასთან დაკავშირებით. საუბრისას მე წამოვწიე უკრაინის NATO-ში მიწვევის საკითხი. სასიამოვნო იყო პრეზიდენტის სიტყვების მოსმენა, რომ უკრაინა იმსახურებს გახდეს NATO-ს წევრი”, – განაცხადა ვოლოდიმირ ზელენსკიმ.
პოზიცია დააფიქსირა თურქეთის პრეზიდენტმაც:
,,უკრაინა იმსახურებს NATO-ს წევრობას! მინდა კიდევ ერთხელ ხაზგასმით აღვნიშნო ის, რასაც ყოველთვის მტკიცედ ვიცავდი – სამართლიანი მშვიდობით არავინ აგებს.
მხარეებს შორის არსებული უთანხმოების მიუხედავად, ჩვენი ყველაზე გულწრფელი სურვილია, დავუბრუნდეთ სამშვიდობო ძალისხმევას. ყველანაირ მხარდაჭერას გავუწევთ, რომ უკრაინა კვლავ ფეხზე დადგეს”, – განაცხადა რეჯეფ თაიფ ერდოღანმა.
ავტორი
ნინი ხიჯაკაძე
