პრეზიდენტის სასახლესთან საპროტესტო აქცია გამართეს მიხელ სააკაშვილის შეწყალების მოწინააღმდეგეებმა. აღნიშნულთან დაკავშირებით ადმინისტრაციის ეზოში განცხადება გააკეთა სალომე ზურაბიშვილმა. მას რაიმე კონკრეტული განცხადება არ გაუკეთებია ქვეყნის მე-3 პრეზიდენტთან დაკავშირებით, თუმცა პროტესტის მონაწილეების ემოციური შეძახილების ფონზე, სიტყვით მიმართვის დროს, დასვა რიტორიკული შეკითხვები:
,,მეორედ არ გავიმეორებ, აქ რასაც ვიტყვი. ასე რომ – ან გაიგებთ, ან ვერ გაიგებთ. მე ძალიან მაინტერესებს და მაქვს ჯერ კითხვები: აქ რომ მოვარდით, ვიღაცების გავრცელებულ ჭორებზე, მაინტერესებს ის ადამიანები, რომლებიც ავრცელებენ ჩემს შესახებ თავიანთ შექმნილ ჭორებს, სად იყვნენ 2007-ში?! სად იყვნენ, როცა უკვე მომხდარი იყო მიშას დროინდელი ტრაგედიები?! სად იყვნენ, როცა ვიდექი ქუჩაში, სად იყვნენ?!
მე გეტყვით სად იყვნენ ისინი, ვინც message box-ებს ავრცელებენ დღეს?! – იყვნენ ან მიშას შტაბში – ერთ-ერთი, ან იყვნენ კარგად მოკალათებული სხვადასხვა თანამდებობებზე, ან იყვნენ ,,ქართუ ბანკში” ისინი, ვინც დღეს “მესიჯ ბოქსით” ავრცელებენ თურმე იციან მე რას გავაკეთებ, როდის გავაკეთებ და რატომ გავაკეთებ?!
მე მინდა, კიდევ ერთი რამე გითხრათ: ვინ შეიწყალა? მე შევიწყალე მურუსიძე, ჩინჩალაძე?! თუ მე განვაწესე ისეთ ადგილებზე, საიდანაც ვერავინ ვერ მოხსნის მათ?! ეს არ არის შეწყალება?! სად ხართ? როდის გააპროტესტეთ?! სად იყავით და სად ხართ?! ესენი არიან თავთავიან ადგილებზე, სადაც არიან!” – განაცხადა სალომე ზურაბიშვილმა.
ავტორი
ნინი ხიჯაკაძე
