ანალიტიკოსი, სააგენტო “პარალელის” ექსპერტი, ალექსი ნონიაძე სოციალურ ქსელში პოსტს აქვეყნებს, სადაც მოსახლეობის ეკონომიკურ და სხვა სახის პრობლემებზე საუბრობს:
“ჯანდაცვისა და სოციალურ საკითხთა კომიტეტმა მოისმინა პრეზენტაცია თემაზე თუ რა პრობლემებია დემოგრაფიაში. ვახსენე, რომ 70 ათასზე მეტი ბავშვი შიმშილობს და თუ ჩვენი მოსახლეობის ეკონომიკური მდგომარეობა არ გაუმჯობესდა, რომელიც ჯანდაცვასთან, სასურსათო უსაფრთხოებასთან, განათლებასთან და სხვა პირდაპირ და არაპირდაპირ მოქმედ ფაქტორებთან კომპლექსშია, სულ ასეთ არასახარბიელო სიტუაციაში ვიქნებით.
სიტყვა შემისწორეს 70 ათასზე მეტი ბავშვი კი არ შიმშილობს არამედ არასრულყოფილად ღებულობს საკვებსო. ჩემი გამოსვლიდან მხოლოდ ამას მიაქციეს ყურადღება.
სანამ საზოგადოებრივად აქტიური ადამიანები (არ დავაბრალებ მხოლოდ პოლიტიკოსებს) ვდავობთ ტერმინებზე და არა პრობლემების მიზეზებზე და მათი გადაჭრის გზებზე უბრალო ადამიანებს არაფერი ეშველებათ და თავიანთ პრობლემებთან მარტონი არიან.
დღეს №296 ავტობუსში ახალგაზრდა გოგონა მოწყვეტით დაეცა. ვიღაცამ შიმშილს დააბრალა, ვიღაცამ გაჭედილ ავტობუსში უაჰაერობას და ვიღაცამ ეპილეფსიას. ვერავინ გაიგო იმ გოგონას რა სჭირდა.
ფაქტია ჩვენს მოქალაქეებს უჭირთ და ჩვენ კიდევ საქსტატის მონაცემების გაკეთილშობილებას ვაქცევთ მხოლოდ ყურადღებას.
სწორი დიაგნოზი განკურნების ნახევარია. თუ დავადებას თავისი სახელს არ დავარქმევთ მკურნალობა არაეფექტური იქნება და საქმეს არ უშველის იმის ძახილი წინა ექიმმა რა შეცდომები დაუშვა“, – წერს ფეისბუქის პირად გვერდზე ალექსი ნონიაძე.
