ზამთრის მოახლოებასთან ერთად რაიონის მოსახლეობისთვის გამოკვეთილ კონკრეტულ პრობლემებზე ისაუბრა სააგენტო “პარალელთან” პარტია “სტრატეგია აღმაშენებლის” ჩხოროწყუს რაიონული ორგანიზაციის ხელმძღვანელმა მაკა შენგელიამ. მისი თქმით რაიონის ხელმძღვანელობა ხალხის პრობლემების მოგვარებით არაა დაკავებული და ბედის ანაბარაა მიტოვებული ადგილობრივი მოსახლეობა:
“ზამთარი ახლოვდება, რაიონში კი გაზიფიკაცია დასრულებული არ არის. სადაც დასრულებულია იქ არ არის ჩართული გაზი, დაახარვეზა კომპანიამ და ვერ აბარებენ პროექტს. შეშა ერთი მანქანა 1700 ლარი ღირს. მოგეხსენებათ რომ ეს ძალიან ძვირია ჩვენი მოსახლეობისთვის. ადგილზე რომ მოიპოვონ, მიწა დარეგისტრირებული უნდა ჰქონდეთ, ჩხოროწყუში კი მიწის რეგისტრაცია სრულფასოვნად მხოლოდ 2023 წლიდან დაიწყება. შესაბამისად დაურეგისტრირებელ მიწაზე შეშის მოჭრა დაჯარიმებას ექვემდებარება. ამასთან, მამაპაპისეული ტყე ისევ დაურეგისტრირებელი რჩება და სახელმწიფო ამ საკითხს ისევ ყინავს. ხალხი კი ზამთარს მოუმზადებელი ხვდება.
მოსახლეობისთვის ეს ძალიან დიდი პრობლემაა იმ ფონზე, როცა სვანეთის გზა ადგილობრივი მეწარმეებისთვის გარემოს დაცვამ ჩაკეტა. ნაგვერდულის ჩამოტანა აიკრძალა და იგი სვანეთში ენგურში იყრება ან იწვება მინდვრად. ეს ერთგვარი იაფი ალტერნატივა იყო აქაური მოსახლეობისთვის როგორც შეშად, ისე მეფუტკრეები იყენებდნენ მას სხვადასხვა საჭირო ინვენტარის დასამზადებლად. გარემოს დაცვა ყველაფერს აკეთებს იმისთვის, რომ გარემო არ დაიცვას და მას ზიანი მიაყენოს, რადგან ხალხს არ აძლევს საშუალებას ხე-ტყის დამუშავებისგან ნარჩენი მასალა გამოიყენონ.
შედეგად კი ჩვენ ვღებულობთ ერთის მხრივ განადგურებულ ტყეს, მეორეს მხრივ დაბინძურებულ მდინარე ენგურს, სვანეთში მიჯრით ცეცხლმოკიდებულ ხე-ტყის ნარჩენებს და გაღარიბებულ, ცივი ზამთრისთვის განწირულ მოსახლეობას.
იმის ნაცვლად, რომ რაიონის მერი ცდილობდეს ზამთარს ხალხი მომზადებული შეხვდეს და ამ კუთხით ღებულობდეს ყველა საჭირო ზომებს, ის დგას და შორიდან უყურებს პროცესს, არც კი ერევა საკითხის მოგვარებაში.
გამოსავალი კი ისაა, რომ ადგილზე მოპოვების შემთხვევაში ადეკვატური გადასახადი დააწესო და ხალხს გამოუწერონ შეშა. ხოლო სვანეთიდან ტრანსპორტირების შეთხვევაში, კანონში განსაზღვრონ ნაგვერდულის პარამეტრები, რათა შეწყდეს მანიპულაცია კანონის მუხლის არასწორი განარტებით. ხალხი მზად არის ნაგვერდულზეც დაწესდეს გადასახადი, ოღონდ მისი გამოყენების უფლება მიეცეთ.
რაც შეეხება გაზიფიკაციის თემას. აქ კომპანიას თვითმმართველობამ უნდა მოსთხოვოს – დათქმულ ვადებში შეასრულოს მასზე დაკისრებული ვალდებულება.
ამ ბიუროკრატიასა და ქაოსში კარს მოგვადგა ზამთარი ჩვენ კი ყოველ დღე თანმდევ პრობლემებს ვუახლოვდებით. ხვალიდან ცუდი ამინდები იწყება სამეგრელოში და ხალხი ბედისანაბარა რჩება, რეალურად მათ უბიძგებენ კანონი დაარღვიონ და დაჯარიმების საფრთხის ქვეშ მოიმარაგონ შეშა.
ეს მთავრობა ყველა სფეროში ბრმა და ყრუა საკუთარი ხალხის პრობლემებთან მიმართებაში“, – აცხადებს მაკა შენგელია.
