დიდი ბრიტანეთის დედოფლის, ელისაბედ II-ის გარდაცვალებას, კლინიკა “ვივამედიდან”, ეხმაურება საქართველოს მე-3 პრეზიდენტი, მიხეილ სააკაშვილი და ფეისბუქის საკუთარ ოფიციალურ გვერდის მეშვეობით თავის მოგონებებს ავრცელებს გაერთიანებული სამეფოს ყველაზე ხანგრძლივ მმართველთან დაკავშირებით:
“მთელი ეპოქა დამთავრდა. ორჯერ ვარ შეხვედრილი ელისაბედ II-ს. საოცარი ცნობისმოყვარეობა, ქარიზმა და იუმორის გრძნობა ჰქონდა. მისი სიკვდილი შეიძლება ნიშნავდეს შოტლანდიისა და ჩრდილოეთ ირლანდიის გამოყოფის პერსპექტივას, ვინაიდან შემაკავშირებელი სწორედ ეს დედოფალი იყო.
მინდა ელისაბედ II-სთან დაკავშირებით შემდეგი ისტორიები გავიხსენო. ჩვენმა პირველმა შეხვედრამ ერთ საათზე მეტი გასტანა. ის ძალიან ცნობისმოყვარე იყო და ყველაფერი აინტერესებდა საქართველოზე. სანდრას კომპლიმენტი უთხრა ჩაცმულობაზე.
2012 წელს კი ლონდონის ოლიმპიადის გახსნაზე ჩავედი, ბუკინგემის სასახლეში მიღება გაიმართა, რომელსაც ბევრი სახელმწიფოს მეთაური დაესწრო. მე კიბეზე გამოვედი დასარეკად და სახით კედელთან ვიდექი. უცებ ვიღაცამ ტელეფონი ხელიდან გამომტაცა, მოვტრიალდი და ხელში შემრჩა დედოფალი – ბატონო პრეზიდენტო, თქვენ რა, არ იცით, რომ ამ სასახლეში მსგავსი მოწყობილობების გამოყენება არ შეიძლება?! – ღიმილით მითხრა მან. შემდეგ გამომკითხა თუ რა ხდებოდა საქართველოში. საოცარი მომხიბვლელობა ჰქონდა“, – აცხადებს მიხეილ სააკაშვილი.
