საზოგადოებრივი არხის სამეთვალყურეო საბჭოს წევრი, ჟურნალისტი ბონდო მძინარაშვილი საქართველოს პრეზიდენტ სალომე ზურაბიშვილთან შეხვედრის თაობაზე თავის პოზიციას აფიქსირებს და ამასთან, შეფასებებს აკეთებს შემდგარი შეხვედრის შემდეგ გამოთქმულ ცალკეულ შეფასებებთან დაკავშირებით:
“პრეზიდენტთან დღევანდელი შეხვედრის ზოგიერთ მონაწილეს მოვუსმინე და სამწუხარო დასკვნა უნდა გაგიზიაროთ:
ზოგიერთ პოლიტიკოსს, უბრალოდ, არ ესმის, რას ნიშნავს პოლიტიკური პლურალიზმი და პოლიტიკური კულტურა!
არსი კი არა, მნიშვნელობაც კი არ იციან, რადგან პოლიტიკის შესახებ ზერელე წარმოდგენა აქვთ და შესაბამისი განათლება აკლიათ!
ამ “პერსონალით” და მისი სავალალო მდგომარეობის გათვალისწინებით კი, პლურალისტური გარემოს ჩამოყალიბება პრაქტიკულად შეუძლებელია!
ამიტომაც არ გვაქვს ჯანსაღი პოლიტიკური პროცესი!
მივესალმები საქართველოს პრეზიდენტის ინიციატივას და აქვე ერთი თხოვნითაც მივმართავ:
ქალბატონო სალომე, უფრო გასაგებად აუხსენით პოლიტიკოსებსაც და საზოგადოებასაც, რა მნიშვნელობა აქვს ამ პროცესს, რა გზა გამოიარა და როგორ დასძლია წინააღმდეგობები ევროპამ, როგორ დაიცხრეს ამბიციები ევროპელმა პოლიტიკურმა აქტორებმა და რა როლს ასრულებდნენ საზოგადოებრივი ინსტიტუტები.
ამ ცოდნის და გამოცდილების გასაზიარებლად კი აუცილებელია მედიასთან აქტიური კომუნიკაცია და საჯარო გამოსვლები, სატელევიზიო ინტერვიუები.
უფრო მეტიც, – ჩემი აზრით, კარგი იქნება, საქართველოს პრეზიდენტის პატრონატით გაიმართოს საერთაშორისო კონფერენცია, რომელშიც მონაწილეობას მიიღებენ ქართველი და უცხოელი მეცნიერები, ანალიტიკოსები და პოლიტიკოსები (ამჟამად აქტიურიც და პენსიაში გასულიც). განსაკუთრებით, აღმოსავლეთ ევროპიდან.
როგორც ვატყობ, ეს პროცესი საკმაოდ ხანგრძლივი იქნება და სასურველია, უმაღლეს სასწავლებლებში, სადაც სოციალურ და პოლიტიკის მეცნიერებებს ასწავლიან, ერთ სემესტრში მაინც დაუთმონ დრო საგანგებოდ მომზადებული სილაბუსით და შესაბამისი ლიტერატურით. ასევე სკოლებში, “სამოქალაქო განათლების” ფარგლებში, განსაკუთრებული ყურადღება მიაქციონ ამ საკითხს.
ვიმეორებ: კარგად მესმის ამ პროცესის მნიშვნელობა და აუცილებლობა და ისიც, რომ ისტორიაში “ზურაბიშვილის ინიციატივის” სახელით დარჩება, თუმცა, ამ ხანგრძლივი პროცესის შედეგიანად დასასრულებლად აუცილებელია კონკრეტულად პოლიტიკოსებში და მთლიანად საზოგადოებაში სამოქალაქო აზროვნების ჩამოყალიბება.
ეს მოკლედ. უფრო ვრცლადაც შეიძლება და გზადაგზა შემოგაშველებთ“, – წერს ფეისბუქის პირად გვერდზე ბონდო მძინარაშვილი.
ინფორმაციისათვის: პრეზიდენტის მიერ ინიცირებული პროცესის ფარგლებში დღეს მორიგი შეხვედრა შედგა პოლიტიკოსებთან, არასამთავრობო ორგანიზაციების, უფლებადამცველებისა თუ სხვა სფეროს წარმომადგენლებთან
