საზოგადოებაში გავრცელებულ მოსაზრებებს ირაკლი ღარიბაშვილსა და ეკატერინე ტიკარაძის უთანხმოებაზე “მწვანე პასპორტების” საკითხთან მიმართებაში, პოლიტიკურ შეფასებას აკეთებს მმართველი პარტიის ლიდერი არჩილ თალაკვაძე და აცხადებს, რომ ეს მოგონილი თემაა. პარლამენტის ვიცე-სპიკერი ასევე აღნიშნავს, რომ ახალი მინისტრის კანდიდატურასთან დაკავშირებით მიმდინარეობს კონსულტაციები:
,,ჰაერიდან მოტანილი თემაა ზოგიერთი ოპოზიციური ტელევიზიის მიერ, რომელსაც საკითხები და დღის წესრიგი ამოწურული აქვთ, ან უბრალოდ იგნორირებას უკეთებენ იმ მნიშვნელოვან საკითხებს, რომლებიც საზოგადოებას ყველაზე მეტად აინტერესებს დღეს.
მესმის, რომ თქვენ გინდათ გაუსწროთ მოვლენებს და პირველებმა შეატყობინოთ საზოგადოებას, თუ რა გადაწყვეტილებები განიხილება, მაგრამ როგორც გითხარით, ეს გადაწყდება კონსულტაციებით. ამ გადაწყვეტილებას მიიღებს საქართველოს პრემიერ-მინისტრი.
მე დარწმუნებული ვარ, რომ ამ მოცემულობაში, ამ ამოცანებთან მიმართებაში – ყველაზე ღირსეული კანდიდატურა იქნება შერჩეული ჯანდაცვის მინისტრის პოსტზე.
რაც შეეხება მწვანე პასპორტს, როგორც ხედავთ, მეც ვსარგებლობ ამ აპლიკაციით და ის არის საერთაშორისო გამოცდილებაზე დაფუძნებული. შესაბამისად, რადგან მთავრობამ ეს გადაწყვეტილება მიიღო, პრემიერ-მინისტრის მეთაურობით და რადგან განვითარებული მსოფლიო იყენებს, საზოგადოებრივი ჯანდაცვის ამ კონკრეტული ამოცანის გადასაჭრელად ამ მექანიზმს, რა თქმა უნდა, მეც მხარს ვუჭერ ჩვენი პოლიტიკური გუნდის გადაწყვეტილებას, მთავრობის გადაწყვეტილებას”, – განაცხადა არჩილ თალაკვაძემ.
ავტორი
ნინი ხიჯაკაძე
