“ბრალდებული მიხეილ სააკაშვილი არ შემოსულა ოფიციალურად სახელმწიფო საზღვარზე და ის იმყოფება საქართველოში” – ლევან ვეფხვაძე

პროკურორი ლევან ვეფხვაძე განცხადება-განმარტებას აკეთებს საქართველოს მე-3 პრეზიდენტის საზღვრის გადმოკვეთის მარშრუტთან დაკავშირებით. მისი თქმით, გამოძიებამ კონკრეტული დეტალები დაადგინა სად და რა მდგომარეობაში გადაადგილდებოდა მიხეილ სააკაშვილი:

,,ერთია – ადამიანი, ბრალდებული მიხეილ სააკაშვილი, ოფიციალურად არ შემოსულა სახელმწიფო საზღვარზე და ის იმყოფება საქართველოში.

რაც შეეხება მეორე საკითხს, რამდენად გამოკვლეულია ის მტკიცებულებებით, რამდენად დგინდება საიდან წამოვიდა და რა მიმართულებით – საგამოძიებო ორგანოს მიერ ჩატარებული საგამოძიებო-საპროცესო მოქმედების შედეგად დეტალურად არის დადგენილი, მათ შორის, უკრაინის სახელმწიფო ტერიტორიაზე ვინ ეხმარებოდა. ეს იყო წინა ხელისუფლების ყოფილი მაღალჩინოსანი, ძალოვანი სტრუქტურიდან, რომელიც ეხმარებოდა ბრალდებულ მიხეილ სააკაშვილს სახელმწიფო საზღვრის უკანონოდ გადმოკვეთის საკითხში.

ასევე, დადგენილია საქართველოს სახელმწიფოში, კონკრეტულად, თუ სად, რა ვითარებაში, რა მდგომარეობაში გადაადგილდებოდა ბრალდებული მიხეილ სააკაშვილი” – განაცხადა ლევან ვეფხვაძემ.

ავტორი
ნინი ხიჯაკაძე