გუშინ, თავისუფლების მოედანზე გამართულ საპროტესტო აქციაზე, ბევრ მომხმარებელს პრობლემები შეექმნა კომუნიკაციის საშუალებების, ინტერნეტის სარგებლობაში. გავრცელდა ასევე ინფორმაცია, რომ მოედანთან ახლოს მდებარე თბილისის საკრებულოს შენობაში აღმოჩენილი იქნა უცნობი სახეობის ტექნიკური მოწყობილობები, რომლებიც, ოპოზიციისა ზოგიერთი წარმომადგენლისა და საპროტესტო აქციის ცალკეული მონაწილეების აზრით, იყო ე.წ. სიგნალის, ინტერნეტის ჩამხშობი და ხმის ჩამწერი მოწყობილობები. აღნიშნულთან დაკავშირებით სპეციალურ განცხადებას ავრცელებს შინაგან საქმეთა სამინისტრო:
“გვსურს, საზოგადოებას მივაწოდოთ ინფორმაცია 14 ოქტომბერს თბილისის საკრებულოს შენობაში არსებული ტექნიკური საშუალებების შესახებ. აღნიშნული მოძრავი რეპიტერია, წარმოადგენს საპოლიციო ინფრასტრუქტურას, რომელიც აძლიერებს, როგორც რადიოსიგნალის მექანიზმს, ასევე, ფიჭურ მობილურ კავშირს.ის გამოიყენება საპოლიციო დანაყოფებს შორის გამართული მუშაობის მიზნით.
აღნიშნული ტექნიკის მობილიზება ხდება ყველა იმ შემთხვევაში, სადაც შესაძლოა, გახდეს საჭირო მასების მართვა და შეუფერხებელი კომუნიკაციის დამყარება საპოლიციო დანაყოფებს შორის, როგორც რადიოსადგურის, ასევე, მობილური კავშირის მეშვეობით“, – ნათქვამია განცხადებაში.
