საქართველოს პრემიერ-მინისტრმა ირაკლი ღარიბაშვილმა ჟურნალისტებთან შეფასებები გააკეთა ქვეყანაში მიმდინარე პროცესებზე და მედიასთან მიმართებაში შედარებებს აკეთებს წინა ხელისუფლებასთან. პრემიერის კომენტარი დისკუსიაში გადაიზარდა და ღარიბაშვილმა უშუალოდ მიმართა ჟურნალისტებს:
,,ერთ რამეს გეტყვით, თქვენ ყველანი სააკაშვილის დროს როგორ იყავით? – სახელმწიფო იყო მოძალადე როგორც ტელევიზიაზე, ასევე ბიზნესზე, მოქალაქეზე, ყველაზე.
თქვენ ხართ ჩვეულებრივი მოძალადე. თქვენ ახლა ძალადობთ ჩემზე. ქუჩაში თუ რაღაც ჩხუბი მოხდა – ეს სახელმწიფომ აღკვეთა და ყველა მოძალადე დაიჭირა. აი ეს არის მთავარი.
თქვენ ახლა ადგილს აფუჭებთ, თქვენ უნდა იყოთ პარტიაში, თქვენ უნდა იყოთ წინა ხაზზე, პარლამენტში მინდა რომ გიხილოთ თქვენ. იმიტომ, რომ თქვენ ხართ ჩვეულებრივი პარტიული აქტივისტი“, – განაცხადა მთავრობის მეთაურმა.
პრემიერმა ვაქცინაციის შესახებაც ისაუბრა და აღნიშნა ამ ეტაპზე მთავარი ამოცანა უნდა იყოს განვითარება და ვაქცინაციაა და რომ დღეს შემოდის ,,ფაიზერის“ ნახევარი მილიონი დოზა:
,,მთავარი მინდა ვუთხრა ჩვენს მოქალაქეებს, რომ მთელი ჩვენი აქცენტი და მთავარი ამოცანა უნდა იყოს განვითარებაზე და ვაქცინაციაზე, რომელზეც თქვენ არ საუბრობთ. ,,ფაიზერის“ ვაქცინა ჩამოდის დღეს 500 000 დოზა, რომელიც არის აშშ-ს მთავრობის დახმარება. ამას გარდა, 1 500 000 ჩინური ვაქცინა არის საქართველოში. კიდევ ერთხელ მინდა მოვუწოდო ჩვენს მოქალაქეებს აქტიური ჩართულობისკენ ვაქცინაციის პროცესში“, – განაცხადა ირაკლი ღარიბაშილმა.
ავტორი
ნინი ხიჯაკაძე
