პარლამენტის დეპუტატმა დავით ბაქრაძემ კრიტიკულად შეაფასა პარლამენტის რიგგარეშე სესიაზე მმართველი გუნდის ქმედებები და აღნიშნავს, რომ ხელისუფლებას არ გააჩნია მართვის რესურსი და შესაბამისად ქვეყანას ემუქრება უმართავობა/არეულობა:
,,დიდი ხანია, რაც პარლამენტის წევრი ვარ და ამ დარბაზს ახსოვს უფრო მძიმე დაპირისპირებაც, მათ შორის ფიზიკური დაპირისპირებებიც, ახსოვს უფრო მძაფრი პროტესტებიც, მაგრამ სხდომები გრძელდებოდა.
ის, რაც მოხდა დღეს ნიშნავს მხოლოდ ერთ რამეს – იმდენად არის ხელისუფლება მორალურად დემორალიზებული და ჩამოშლილი, რომ მათ არ შეუძლიათ ჟურნალისტების მხრიდან ბანერით, აბსოლიტურად მშვიდობიანი და ცივილური ბანერით გამოხატული პროტესტის ატანაც კი. ეს ნიშნავს იმას, რომ აბსოლუტურად სხვაგან ვართ და ერთი პრობლემა, რომელიც გვქონდა დაუსჯელი ძალადობის პრობლემის სახით, გადაზრდილია მეორე და ბევრად უფრო მძიმე პრობლემაში ქვეყნისთვის, რომ ხელისუფლებას აღარ აქვს მართვის რესურსი.
ის, რაც დღეს ვიხილეთ, როცა უმრავლესობა ვერ ახერხებს, რომ შს მინისტრი შემოიყვანოს პარლამენტში, როცა ვერ ახერხებს, რომ მინისტრის მოსმენა უზრუნველყოს პარლამენტში, ნიშნავს მხოლოდ ერთს: ამ ხელისუფლებას მართვის რესურსი არ აქვს, ქვეყანას ემუქრება უმართავობა/არეულობა და ყველა ის პრობლემა და საფრთხე, რომელიც მოდის არეულობიდან.
ამიტომ გამოსავალი არის მხოლოდ ერთი და მინდა თითოეულ ადამიანს მივმართო, ვინც ,,ქართულ ოცნებაშია“, მაგრამ საღი აზრი აქვს დარჩენილი და ეს ქვეყანა უყვარს, გამოსავალი არის ერთი – პოლიტიკური პასუხისმგებლობის აღება; შინაგან საქმეთა მინისტრის და პრემიერ-მინისტრის გადადგომა; დამნაშავეების დასჯა. ამით ვითარების დამშვიდება და მოხერხდება შედარებით ნორმალიზებული ვითარებით შემოდგომის არჩევნებზე გასვლა. სხვანაირად ის, რაც ვიხილეთ დღეს აქ, განმეორდება ყველგან, ყველა ბრიფინგზე, ყველა მოსმენაზე, ყველა სამინისტროში.
ჩვენ უბრალოდ გვეყოლება ხელისუფლება, რომელიც ვეღარ მართავს ქვეყანას. უკვე ასეთი ხელისუფლება გვყავს და დღეს ეს ამის სიმპტომი იყო. ამიტომ გამოსავალი გახლავთ მხოლოდ ერთი, ვიმეორებ – პასუხისმგებლობის აღება, გადადგომა, დამნაშავეების დასჯა, ამ ჟურნალისტების სამართლიანი პროტესტის გათვალისწინება, ვითარების შედარებითი ნორმალიზაცია და სტაბილიზაცია და ამ ფონით მისვლა არჩევნებამდე, რომ უკვე არჩევნებზე გადაწყდეს რა და როგორ გაგრძელდება ამ ქვეყანაში.
წინააღმდეგ შემთხვევაში, მე ვხედავ, რომ ამ ქვეყანაში ძალიან მძიმე არეულობის, დაპირისპირების და უმართაობის საფრთხე არსებობს და პირველ რიგში, სწორედ ხელისუფლების პასუხისმგებლობაა ეს საფრთხე არ დაუშვას, საკუთარ სკამს და თანამდებობას არ გადააყოლოს ეს ქვეყანა“, – განაცხადა დავით ბაქრაძემ.
ავტორი
ნინი ხიჯაკაძე
