როგორც ცნობილია, 3 ივლისიდან ვაქცინაციის მისაღებად მომხმარებლები ვერ რეგისტირდებიან საიტზე booking.moh.gov.ge. დევნილთა, შრომის, ჯანმრთელობისა და სოციალური დაცვის მინისტრის პირველმა მოადგილემ, თამარ გაბუნიამ კომენტარი გააკეთა აღნიშნულ პრობლემასთან დაკავშირებით და განაცხადა, რომ თუ ვებ-გვერდზე ხარვეზების აღმოფხვრა ვერ მოხდება უახლოეს საათებში, კლინიკების გახსნიან ქოლ-ცენტრებს და ამ ალტერნატიული ვარიანტით გაგრძელდება ვაქცინაციაზე რეგისტრაციის პროცესი:
,,24 საათიან რეჟიმში მუშაობს ტექნიკური ჯგუფი. გარკვეული ხარვეზები გამოსწორდა, თუმცა ჯერ-ჯერობით ბოლომდე ყველა ხარვეზის გამოსწორება ვერ მოხერხდა.
გუშინდელი ინფორმაციით, რამდენიმე საათი მოითხოვეს ტექნიკოსებმა იმისთვის, რომ ხარვეზი აღმოფხვრილიყო. როგორც ჩანს, დაზიანება მეტად კომპლექსური იყო, ვიდრე თავიდანვე შეფასდა. ამდენად ჯერ-ჯერობით პროცესი მიმდინარეობს. ჩვენთვის რთულია ზუსტი ვადების დასახელება.
მასიური ვაქცინაციის პროგრამის დაწყება ჩვენი მთავარი პრიორიტეტია და გარდა იმისა, რომ რეგისტრაციის პორტალს ვიყენებთ ჩვენ ამ მიზნებისთის, არსებობს სხვა ალტერნატიული გზებიც.
150 დაწესებულება, რომელიც ჩართულია ვაქცინაციის პროგრამაში – ხვალ/ზეგ გახსნის თავიანთ ქოლ-ცენტრს, სადაც მოქალაქეს ექნება იმის შესაძლებლობა, რომ უკვე ადგილზე დარეკოს და იქვე დაჯავშნოს რიგი.
ეს ჩვენ საშუალებას მოგვცემს, რომ მოქალაქეებისთვისაც ადვილი იყოს ვაქცინაზე ხელმისაწვდომობა და ასევე, რიგებიც ავიცილოთ თავიდან“, – განაცხადა თამარ გაბუნიამ.
ავტორი
ნინი ხიჯაკაძე
