„ვენეციის კომისიის დასკვნაში მოცემული არცერთი რეკომენდაცია არ არის გათვალისწინებული,“ – პარლამენტის პლენარულ სხდომაზე მიმართა უმრავლესობის წარმომადგენლებს ფრაქცია “ერთიანი ნაციონალური მოძრაობა – გაერთიანებული ოპოზიცია ძალა ერთობაშიას” წევრმა თინათინ ბოკუჩავამ.
მისი თქმით, შარლ მიშელის დოკუმენტში არ არის გაწერილი მთელი რიგი იმ რეგულაციებისა, რომელიც განსახილველ კანონპროექტშია მოცემული.
„კანონპროექტი მეორე მოსმენით განხილვამდე ვენეციის კომისიას გაეგზავნა იმ მიზნით, რომ მეორე მოსმენით განხილვისას გათვალისწინებული ყოფილიყო მის მიერ მომზადებული რეკომენდაციები. ვენეციის კომისიის დასკვნაში მოცემული არცერთი რეკომენდაცია არ არის გათვალისწინებული“, – აღნიშნა თინათინ ბოკუჩავამ .
დეპუტატის განმარტებით, ვენეციის კომისია დასკვნაში კიდევ ერთხელ მოუწოდებს საქართველოს პარლამენტს, რომ სისტემური, ყოვლისმომცველი, ჰოლისტიკური რეფორმა შეიმუშაოს, რომელიც ქვეყნის გრძელვადიან სტაბილურობაზე იქნება გათვლილი.
„აღნიშნული მოწოდება კიდევ ერთხელ ადასტურებს, რომ ეს არის დროებითი, ტრანზიციული ცვლილებები, რომელმაც შემდეგ არჩევნებამდე უნდა მიგვიყვანოს. მერე კი დარწმუნებული ვარ, მოხდება ხელისუფლების მშვიდობიანი ცვლა და მხოლოდ ამ მომენტის შემდგომ შეძლებს სქართველოს პარლამენტი, შეიმუშაოს ისეთი ფუნდამენტური საარჩევნო ცვლილება, რომელიც მართლაც დაუბრუნებს ადამიანებს არჩევანის თავისუფლებას“, – განაცხადა თინათინ ბოკუჩავამ.
ინფორმაციას პარლამენტის საზოგადოებასთან ურთიერთობისა და ინფორმაციის დეპარტამენტი ავრცელებს
