“ოცნებას”, მიუხედავად იმისა, რამდენ პროცენტს აიღებს, უბრალოდ ლეგიტიმაციის პრობლემა აქვს და ამ პრობლემას 50%-ითი და 43%-ით ვერ მოაგვარებს – განაცხადა ყოფილმა პრემიერმა, გიორგი გახრიამ ტელეკომპანია “პირველის” გადაცემა “რეაქციაში”. მის ამ პოზიციას მწვავე შეფასება მისცა მოქმედმა პრემიერმა, ირაკლი ღარიბაშვილმა და განაცხადა, რომ “ქართული ოცნება” ადგილობრივი თვითმმართველობის არჩევნებში დამაჯერებლად გაიმარჯვებს:
“ამ განცხადებას აქვს ლეგიტიმაციის პრობლემა და ამის საფუძველი არ არსებობს – ეს ერთი. მეორე – მინდა ვთქვა, რომ ჩვენ არჩევნებზე გავალთ ძალიან ძლიერად, ყველა ოპოზიციონერმა იცის, რომ ყველა მუნიციპალიტეტს ჩვენ დამაჯერებლად მოვიგებთ, არათუ 43%-ს, არამედ 53%-ს ველოდებით. ეს გადაეცით ყველას!
ჩვენ ვიხილეთ უპრეცედენტო ნაბიჯი გახარიას მხრიდან, ამას ალბათ მსოფლიო ანალოგი არ მოიპოვება, როცა პრემიერ-მინისტრი გადადგა იმის გამო, რომ კანონი არ აღსრულებულიყო და ჩვენ მოვისმინეთ მისი განმარტებები, რომ იყო მომატებული რისკი. მე მინდა ძალიან მარტივი შედარება გავაკეთო, რომ ნებისმიერ ოპერაციის ჩატარებას თან ახლავს რისკები და ეს მას, როგორც შს ყოფილ მინისტრს, უნდა ახსოვდეს. ჩვენ ინფორმაცია გვქონდა, რომ იქ არავითარი შეიარაღებული დაპირისპირება არ იგეგმებოდა, არ იყო მოსალოდნელი. იქ იყვნენ ჟურნალისტები, პოლიტიკოსები და როგორ წარმოგიდგენიათ, რომ ხელჩართული ბრძოლა ამტყდარიყო?!
მაგრამ მოგეხსენებათ, რომ მან ეს გადაწყვეტილება მიიღო, მის ამ ქმედებას დაერქვა სახელი. როცა კრიზისის დროს პრემიერ-მინისტრი, რომელიც გუნდის ლიდერი იყო მაშინ, მას უნდა აეღო პასუხისმგებლობა, ჩემი შეფასებით.
როგორც მოგეხსენებათ, ჩვენ რამდენიმე დღეში, ჩემი და ბატონი გომელაურის ხელმძღვანელობით ჩავატარეთ ოპერაცია, უპრობლემოდ, არავინ დაზიანებულა. როგორ ფიქრობთ, მე არ ვფიქრობდი რისკებზე?!” – განაცხადა ირაკლი ღარიბაშვილმა.
