შარლ მიშელის დოკუმენტზე ხელმომწერი ოპოზიციონერი პოლიტიკოსები დღეს გამართულ პარლამენტის სხდომას დაესწრნენ. სხდომის დაწყებამდე ,,სტრატეგია აღმაშენებლის“ ლიდერმა გიორგი ვაშაძემ განცხადება გააკეთა და აღნიშნა, რომ დღეს მოხდება გიორგი რურუას გათავისუფლება პატიმრობიდან:
,,დღეს ველოდებით, რომ გიორგი რურუას შეწყალება იქნება. პარალელურად ჩვენ დღესვე გვექნება პარლამენტში კიდევ ერთი სამუშაო შეხვედრა ამნისტიის კანონთან დაკავშირებით და არა მხოლოდ. 15, 20 სხვადასხვა ტიპის საკონსტიტუციო ცვლილებები, არამედ ორგანული და სხვა კანონებია მისაღები.
გვინდა, რომ ინვენტარიზაცია გავაკეთოთ რა არის დღეს პარლამენტში ინიცირებული, რომ რაც შეიძლება სწრაფად მოხდეს შეთანხმება, რომელიც არის საქართველოს ევროპისკენ ინტეგრაციის ერთადერთი გზა.
ეს შეთანხმება, რაც შეიძლება სწრაფად უნდა შესრულდეს. ჩვენ ვიმუშავებთ ამ ეტაპზე მხოლოდ იმ საკითხებზე, რასაც მოიცავს შეთანხმება. ვფიქრობ, ეს პრიორიტეტი პარლამენტსაც უნდა ჰქონდეს და სხვა საკითხები უნდა გადავწიოთ.
ნიკა მელია განთავისუფლდება ამნისტიის კანონის მიღების შემდეგ.
აქვე ვამბობ, თუ სხვა მხარეები შეთანხმდებიან, რომ გირაო მისაღებია მათთვის, არც აქ არ გვაქვს პრობლემა“, – განაცხადა გიორგი ვაშაძემ.
ავტორი
ნინი ხიჯაკაძე
