კომპანია „უნისტილის“ ოფისში გაიმართა პრესკონფერენცია, სადაც კომპანიის დირექტორმა ნატალია ჩხეიძემ, მისმა ოჯახმა და ადვოკატებმა, მედიას წარუდგინეს დოკუმენტაცია, რომლის მეშვეობითაც ამტკიცებენ, რომ მათი ბიზნესის უკანონო დაყადაღება მოხდა და ადგილი აქვს კომპანიის მიზანმიმართული განადგურების მცდელობას, სახელმწიფოს მხრიდან.
დაყადაღებული ბიზნესი, სამკერვალო კომპანია „უნისტილი“, რომელიც პანდემიის პირობებში უწყვეტ რეჟიმში მუშაობდა, ფინანსურმა პოლიციამ დააყადაღა, მიზეზი ის ჯარიმაა, რომელიც კომპანიას 2010-2012 წლებში დაუგროვდა. „უნისტილში“ ამბობენ, რომ ჯარიმა მათ გასულ წლებში უსამართლოდ დააკისრეს. დაყადაღებული კომპანია დიმიტრი ჩხეიძის მეუღლეს ეკუთვნის, ჩხეიძე მთაწმინდის გამგებლის მოადგილე იყო, მას თბილისის ბიუჯეტიდან გიგი უგულავასთან ერთად, 48 მლნ ლარის გაფლანგვას ედავებოდნენ, თუმცა სასამართლომ ჩხეიძე გაამართლა, დღეს კი გამგებლის ყოფილი მოადგილე და მისი ოჯახი ხელისუფლებას დევნაში ადანაშაულებს:
„28 სექტემბერს კომპანია „უნისტილი“ დააყადაღეს… საფუძვლიანად ვფიქრობთ ეს არის პოლიტიკური ზეწოლა და ნათელია, რომ ჩვენი განადგურება უნდათ. საწარმოს დაადეს ყადაღა და ყიდიან აუქციონზე. ყოველდღე გვაწუხებს შემფასებელი, რომ უნდა გაიტანოს ეს ქონება და გაყიდოს.
7 წლის წინ ფაბრიკაში 100 ადამიანი მუშაობდა, სანამ შემოვიდოდნენ და დაგვაყადაღებდნენ, ახლა დასაქმებულია 10 კაცი. კომპანიაზე ზეწოლა იქიდან დაიწყო, რომ ჩემი მეუღლე დაიჭირეს რამდენიმე წლის წინ. ჩემი ბიზნესის ჩაძირვაც მაშინ დაიწყეს როდესაც ჩემს ქმარს აიძულებდნენ მიეცა სასურველი ჩვენება, თუმცა ეს არ გააკეთა, შემდეგ კომპანიაში შემოვიდნენ და ყოველდღე ინვენტარიზაციას ატარებდნენ. ბანკებში გადაგზავნეს ინფორმაცია, რომ ვითომ ფულს ვათეთრებდით, რაც, რა თქმა უნდა, ვერ დაამტკიცეს და უბრალოდ ბანკებთან ურთიერთობა გაგვიფუჭეს, ასევე მეწარმეებთან. ჩვენ მივმართეთ სახალხო დამცველს, ყველა ინსტანციას, დავწერეთ განცხადება შემოსავლების სამსახურშიც, მაგრამ ადექვატური რეაგირება არცერთი უწყებიდან არ მიგვიღია.
ჩვენ ვართ ქართველი ინვესტორები, რომლებმაც შევქმენით სამუშაო ადგილები, ყველა დასაქმებულის უკან ოჯახი დგას, თუმცა სახელმწიფომ არ მოგვცა მუშაობის საშუალება და 100 სამუშაო ადგილიდან ახლა მხოლოდ 10-ია დარჩენილი კომპანიაში. ჩემი მეუღლის გამო აწყობთ, რომ კომპანია „უნისტილის“ საკითხი გადაიტანონ პოლიტიკურ ჭრილში“, – განაცხადა ნატალია ჩხეიძემ.
ავტორი
ემილი ფეიქრიშვილი
